د غزني ولایت د قره باغ ولسوالۍ لسګونه اوسيدونکي د دغه ولایت ښار کې د یو اعتراضیه ناستې په ترڅ کې ادعا کړې، چې د دغې ولسوالۍ امنیه قوماندان ۲ تنه ملکي وګړي په ډزو وژلي دي.
دوی وايي، چې د قره باغ امنیې قوماندان د دغې کړنې په اعتراض يې خپلې ټولې ښوونځي تړلې دي.
اعتراض کوونکي د غزني ولایت په الجهاد جومات کې ټول شوي و او د پولیسو د ناوړو کړنو څخه يې شکایتونه کول.
د قره باغ ولسوالۍ اوسېدونکي زیاتوي، چې دوی د پولیسو له زور زیاتي سره مخ شوي او په دې وروستیو کې پولیس د یادې ولسوالۍ "ولي جان" نومي کلي ته ورغلي او ۲ تنه يې له طالبانو سره د همکارۍ په تور په ډزو وژلي دي.
د غزني د قره باغ ولسوالۍ دغه لسګونه اوسېدونکي وايي، چې دوی د پولیسو د دغې کړنې په اعتراض خپل ټول ښوونځي تړلې دي.
دوی خبرداری ورکوي، تر هغه چې د قره باغ امنیه قوماندان بدل نه شي، نو د دوی ښوونځي به تړلي پاتې وي.
.jpg)
د راپورونو له مخې دغه دوه هلکان د ښوونځي زده کوونکي او عمرونه يې ۱۷ او ۱۱ کلونو پورې و.
له بل لوري د قره باغ ولسوالۍ امنیه قوماندان روح الله پوپل زي د دغو ادعاو په ردولو سره سلام وطندار ته وویل، چې په غزني کې د ښوونځيو تړل کېدل د پولیسو او شخصاً د ده پر وړاندې د طالبانو له لورې جوړه شوې توطیه ده.
نوموړي زیاته کړه، چې طالبان غواړي د عامو خلکو د فشار په واسطه په دغه ولسوالۍ کې د امنیتي ځواکونو فعالیت په ټپه ودروي.
له بل لوري د غزني والي عبدالکریم متین بیا په قره باغ کې د ښوونځیو د تړلو لامل طالبان بولي او زیاتوي، چې د دوو هلکانو د قتل د څېړلو له پاره يې یو پلاوی سیمې ته ليږلی دی.
نوموړي زیاته کړه، چې د قره باغ ولسوالۍ د ښوونځيو د بېرته خلاصولو په موخه به له هرې ممکنې لارې کار واخلي.
داسې اوازه وه، چې په غزني کې له دې امله ۵۰ ښوونځي تړل شوي، خو د غزني د پوهنې رییس محمد عابد عابد د ۵۰ بابه ښوونځيو د تړلو خبره ردوي او وايي، چې په قره باغ کې یوازې ۸ بابه ښوونځي تړل شوي او ډېر ژر به دغه ښوونځي هم خلاص کړي.
د ویلو ده، چې قره باغ ولسوالۍ د غزني یو له ناامنو ولسوالیو په ډله کې شمېرل کيږي، چې زیاتې سیمې يې د وسله والو طالبانو په ولکه کې دي.
