د امریکا ولسمشر ډونالډ ټرمپ د ناټو غړو هېوادونو سازمان په غونډه کې د ناټو پر ملګرو نيوکه وکړه، چې د دغه سازمان لهپاره کافي مالي پانګونه نه کوي او د لګښت زیاته برخه يې د امریکا پر اوږه اچولې ده.
د ناټو په نوي مرکزي دفتر کې پرون (پنج شنبه می۲۵مه) د غړو هيوادونو د دولتونو او د حکومتونو مشرانو سرمشريزه غونډه درلوده.
د ناټو غړو هيوادونو د دغه سازمان لهپاره پر يو ډول مالي پانګونه او د ترهګرۍ پر ضد پر قوي هوډ ټينګار وکړ.
د سازمان عمومي منشي ينس سټونلټنبرګ له غونډې وروسته خبريالانو ته وويل، چې غړي هيوادونه د ترهګرۍ پر ضد مبارزه کې د لا زياتو هڅو او د ناټو د مالي مصارفو لپاره پر مساوي پانګونه پر يوه خوله دي.
هغه يادونه وکړه، چې ناټو به د داعش پر ضد د نړيوال سازمان غړيتوب تر لاسه کړي، خو په جنګي فعاليتونه کې به برخه نه اخلي.
د ده پر وينا، دغه غړيتوب به په سياسي برخو، روزنې او د ظرفيت په لوړولو کې مرسته وکړي.
هغه وویل، د ناټو غړو هيوادونو چې په سازمان د پانګونې په اړه په ۲۰۱۴ کال کې کومې ژمنې کړي وي د هغو د عملي کولو لهپاره کلني پلانونو ترتيب شوي دي.
نوموړي زیاته کړه، چې هر غړی هيواد به په دغه کلني پلانونو کې د نغدي مرستې، ظرفيتونو او نورو مرستو په اړه خپلي ژمنې عملي کوي.
په دغه سرمشريزه غونډه کې مانټينيګرو هيواد د ناټو د نوي غړي په توګه ومنل شو.
له ناستې مخکې د جرمني ولسمشرې انګيلا ميرکل د برلين تاريخي ديوال يادګار او د امريکا ولسمشر ډونلډ ټرمپ د ۹/۱۱ او د اساسي قانون د ۵ مادی يادګار ناټو ته وسپارل. دوی ژمنه وکړه، چې ناټو به تل د خپلو ملګرو او ارزښتونو دفاع وکړي.
