د ولسي جرګې غړي غلام حسین ناصري سلام وطندار ته وویل چې ولسمشر د ټاکنو کمېسیون د نوي غړي پېژندلو لهپاره د غوراوي کمېټې له ټاکلو سره د ټاکنو قانون نقض کړیدی.
د ولسمشر محمدارشرف غني لهخوا معرفي شوې غوراوي کمېټه پرون د مشرانو جرګې د دارلانشاء رییس حفیظالله هاشمي د ټاکنو کمېسیون د نوي غړي په توګه وپېژند.
د ښاغلي ناصري په وینا، هغه شخص چې د قانون خلاف انتصاب شي؛ حقوقي مشروعیت نه لري.
د ولسي جرګې غړي غلام حسین ناصري زیاته کړه چې د غیرمسلکي کسانو انتصاب د دې سببېږي چې افغانستان یو ځل بیا له درغلیو ډکې ټاکنې تجربه کړي.
د افغانستان د ټاکنو روڼتیا څار بنسټ رییس نعیم ایوبزاده وايي چې حکومت د ټاکنو په کمېسیون کې د ورته شان کسانو له ګومارنې او په هېواد کې سیاسي اختلافونو سره په ټاکلې نېټې د ولسي جرګې او ولسوالیو شوراګانو له ټاکنو تښتي.
د نوموړي په خبره، د ټاکنو خپلواک کمېسیون د حکومت په منګولو کې دی او ټولې پرېکړې يې د حکومت لهخوا کېږي.
د ښاغلي ایوبزاده په باور، د ټاکنو خپلواک کمېسیون نوی غړی د یو ناقانونه بهیر له لارې ګومارل شویدی.
سیاسي فعال اصف اشنا پهدې نظر دی چې حکومت له ناقانونه کړنو او د ټاکنو خپلواک کمېسیون کې د ورته شان کسانو انتصاب سره د هېواد په راتلونکیو ټاکنو کې د درغلیو په لټه کې دی.
دی وايي چې د ملي یوالي حکومت مشران د راتلونکیو ټاکنو مهندسيکولو لهپاره قانون نقضوي چې دا په ښکاره او روښانه توګه د ټاکنو قانون پر وړاندې د کودتا کولو هڅه ده.
پهدې اړه مو د ټاکنو خپلواک کمېسیون د نظر اخیستلو هڅه وکړه؛ خو له بیا ـ بیا اړیکو سره بریالي نهشو.
