د وزیرانو ځانګړې محکمې د مخابراتو پخواني وزیر د تورونو څېړنه پيل کړه

د مخابراتو او معلوماتي ټکنالوژۍ پخوانی وزیر عبدالرزاق وحیدي چې په فساد کې د لاس درلودو په تور له دندې لېرې شوی و، نن یې د وزیرانو ځانګړې محکمې غونډې ته د تورونو څېړنو په موخه د څارنوال له‌خوا اتهام‌نامه وړاندې شوه.

څارنوال میرعبدالمعروف ‌ذاکر وویل، د څېړنو له پایلو وروسته جوړه شوې اتهام‌نامه کې راغلي چې ښاغلی وحیدي د دندې پرمهال له واک څخه د ناوړه ګټې اخیستو له امله، اساسي قانون او ځینې نور قانونه تر پښو لاندې کړي دي.

د ښاغلي معروف د خبرو پر بنسټ، تورن وحیدي د وزیرانو شورا د مقررو او قانون خلاف ځینې کسان په لوړو تنخواوو د سلاکارانو په توګه نورو بستونو کې په دندو ګومارلي دي.

دغه‌راز د ټیلفوني کرېډیټ کارتونو د لس سلنه ټکس ترلاسه کولو مسله کې یې هم عامه شتمني ته زیان رسولی دی.

ورته وخت کې د مخابراتو او معلوماتي ټکنالوژۍ پخوانی وزیر عبدالرزاق وحیدي وايي، له ده، سره قومي او سیاسي چلند شوی دی.

د هغه په وینا، که د ده پر ځای د کوم بل قوم وزیر وی؛ نو داسې چلند ورسره نه کېده.

د ښاغلي واحدي مدافیع وکیل د اتهام‌نامې پر وړاندې د دفاعیې له وړاندې کولو وروسته، د مخابراتو او معلوماتي ټکنالوژۍ په پخواني وزیر لګول شوي تورونه رد کړل او ځینې نور حکومتي بنسټونه یې تورن معرفي کړل.

خو د غونډې په پای کې د سترې محکمې د عالي شورا غړي او د وزیرانو د ځانګړې محکمې د  قضاییه هیئت رییس محمدزمان سنګري وویل، دا غونډه به راتلونکې کې جوړه شي چې د موضوع په اړه به بحث دوام وکړي او په رڼا کې به یې محکمه پرېکړه وکړي.