.jpg)
د نورستان ولایتي شورا غړي او پولیس وايي، د دغه ولایت د پولیسو معاشونه د روان لمریز کال له وري میاشتې راهیسې نه دي ورکړل شوي چې له امله یې پولیس سرتېري له زیاتو ستونزو سره مخ دي.
د دې ولایت د نورګرام او ځېنو نورو ولسوالیو پولیسو د ټیلیفون پر لیکه سلاموطندار ته وویل چې د دوه ـ درېیو میاشتو لهپاره يې د معاشونو ځنډېدل معمولي خبره ده، خو دا ځل يې ان د څلور میاشتو تنخواګانې ورکړل شوي نهدي.
دغه پولیس نه غواړي چې نومونه او د دندو ځایونه یې مشخص شي وايي، د تېر لمریز کال د غبرګولي له میاشتې یې په اعاشې کې هم کموالی راغلی چې ځېنو مواردو کې ان له کوره ډوډۍ وړي.
سرچینه وايي، د دوی د معلوماتو لهمخې کامدېش، برګیمټال، وایګل، دواب، منډول او نورګرام ولسوالیو کې د پولیسو معاشونه ځنډول کېږي.
.jpg)
په ورته وخت کې د نورستان د ولایتي شورا غړي عمر فاروق هم سلاموطندار ته وویل، د دغه ولایت امنیه قومنداني په یوه او بله پلمه د پولیسو معاشونه په میاشتو ـ میاشتو ځنډوي چې دا کار پولیس له دندو زړه تورې کوي.
عمر فاروق، د ولایت امنیې قوماندانۍ مشرتابه له پولیسو سره په ناسم چلند تورنوي.
د نورستان امنیه قوماندان سمونوال سیدعباس سادات د پولیسو د معاشونو ځنډ ستونزه مني، خو وايي، پولیسو ته به د هغوی له بایومیټریک وروسته د معاشونو وېش لړۍ پیل کړي.
مخکې تردې هم د نورستان پولیسو او نورو پوځیانو د تنخواګانو ځنډېدو، اعاشې، اباطې او وسلو کموالي په اړه شکایتونه کړي وو؛ خو مسوولانو یې پړه یا په مرکزي ادارې وراچولې او یا یې هم د لارو خرابوالي او ناامني د دغو ستونزو لاملونه بللي دي.
