.jpg)
د هنر او د لوبو ډګر ځېنو ستورو او همدا ډول یو شمېر سیاسي او ټولنیزو شخصیتونو د بارسلونا کلپ مشهور لوبغاړي لیونل مسي او د پاپ مشهور هنرمنده شکیرا د ملګرو ملتونو د بشردوستانه اهدافو د تحقق له پاره یوه ډله جوړه کړې ده.
د ملګرو ملتونو سر منشي بانکي مون څه وخت مخکې د لوبې او هنر نړۍ له وتلو ستورو څخه غوښتي و، چې د ملګرو ملتونو نړۍ پایښت لرونکې پراختیا اهدافو په تحقق کې مرسته وکړي.
لیونل مسي د یونیسف له خوا د سولې سفیر دی او شکیرا هم د ملګرو ملتونو د بشردوستانه فعالیتونو په لړ کې په کولمبیا کې بوخته ده.
د نړۍ نور نفوذ لرونکي کسان لکه د علي بابا د شرکت موسس جک ما، د بلژیک ملکه ماتیلده او د سوېډن ملکه ویکتوریا په دې ډله کې دي.
د ملګرو ملتونو ویاند فرهان حق وايي، چې د لوبې، هنر او د سیاست ډګر نفوذ لرونکي کسانو په مرسته کولی شي، چې په راتلونکي کې د دغه سازمان اهداف نور هم ګټور ثابت شي.
.jpg)
د نړۍ پایښت لرونکې پراختیا (SDG) د ملګرو ملتونو له اوږدمهالو موخو څخه ده.
دغه طرحه د ۱۹۵ هېوادونو د رایو په غوڅ اکثریت په ۲۰۱۲ کال کې تصویب شوې ده.
د ملګرو ملتونو په دې طرحه کې د تاوترخوالي او غربت له منځه وړل، له تبعیض او له جنسي نابرابریو سره مبارز او دې ته ورته نورو ستونزو سره مبارزه کول په کې شامل دي.
