د افغانستان ازادو رسنیو ملاتړ دفتر (نی) نن کابل کې خبري غونډې ته وویل چې د ملي یووالي حکومت په څلور کلنه واکمني کې ۵۳ خبریالان وژل شويدي.
د نی اجرایوي رییس مجیب خلوتګر وایي، په تېرو ۱۷ کلونو کې له ۹۵ کورنیو او بهرنیو وژل شویو خبریالانو ۴۴٪ د حامد کرزي په واکمني او ۵۶٪ نور د ملي یووالي حکومت په دوران کې وژل شويدي.
د ښاغلي خلوتګر په وینا، په ملي یووالي حکومت کې د ښاغلي کرزي د واکمنۍ په پرتله د خبریالانو د سر کلنی زیان ۴ برابره زیات شوی. د ده په خبره، د محاسبې له مخې، د پخواني ولسمشر کرزي په واکمنۍ کې هر کال ۳ خبریالان وژل کېدل.
ښاغلی خلوتګر زیاتوي، د حکومت د ورکړل شویو شمېرو پر بنسټ او د خبریالانو هغه مړي چې دوی لیدلي، معلومېږي چې خبریالان په لوی لاس وژل کېږي.
د نی مسوولان وایي، داسې ښکاري چې حکومت د غوایي لسمې او تېرې چهارشنبې له ځانمرګي بریدونو وروسته ـ چې یو خبریال او یو عکاس پهکې ووژل شو ـ د ترهګریزو پېښو ژوندی پوښښ ودروي.
د ښاغلي خلوتګر په وینا، د حکومت دا پرېکړه ناقانونه ده او که حکومت په ژوندۍ بڼه د پېښو بهیر خپرولو پر وخت د خبریالانو امنیت ساتنې توان نه لري؛ رسنیو ته دې د ډرون کمرو له لاري د خبري پوښښ اجازه ورکړي.
د نی اجرایوي رییس همداراز وویل، باید د خبریالانو د وژل کېدلو او عدم امنیت په اړه ځواب ووايي.
د کابل په دشتبرچي سیمې په یو ورزشي کلپ باندې د تېرې چهارشنبې ورځې بریدونو کې د نورو هېوادوالو ترڅنګ ۲ خبریالان ووژل شول او ۵ نور ټپيان شول.
