د هرات د ولایتي شورا رییس د نیولو په اړه د لویې څارنوالۍ له حکمه وروسته، اوس د ولایتي شورا یو شمېر غړي د قانون د پلي کېدا غوښتنه کوي؛ خو ځېنې بیا د لويې څارنوالۍ د دې حکم مخالفت کوي.
تېره پنجشنبه وروسته له هغې د هېواد د لویې څارنوالۍ له خوا د هرات ولایت د ولایتي شورا د رییس کامران عليزايي د نیولو حکم صادر کړ، چې نوموړي له استېناف محکمې نه د اداري فساد یو تورن وتښتولو.
د افغانستان لویې څارنوالۍ له ملي امنیت او بهرنیو چارو وزارته غوښتي دي، چې ممنوع الخروج اعلان شوی کامران عليزايي ونیسي او دنده یې وځنډوي.
د هرات ولایتي شورا ځېنې غړیو نن ورځ له کامران علیزايي نه په ملاتړ د دې شورا دروازه وتړله؛ خو ځېنو بیا د قانون د پلي کېدلو خبره کوله.
د هرات ولایتي شورا غړی سید عظیم کبرزاني وايي، چې د ملي یووالي حکومت باید د خپلو احکامو او خبرو په اړه له جدیته کار واخلي. د ده په خبره حکومت باید د د هرات ولایت قضایاوتو ته په جدي ډول پام وکړي.
کبرزاني د ولایتي شورا د دروازې تړل د قانون خلاف کړنه ګڼي.
په ورته وخت کې د هرات د والي ویاند جیلاني فرهاد وايي، چې د لویې څارنوالۍ حکم به عملي شي.
د ده په خبره ولایت ته هدایت شوی او دوی خپلو امنیتي ارګانونو ته امر کړی، چې په دې برخه کې اقدام وکړي او قانون تطبیق کړي.
خو د دې ولایت د ولایتي شورا یو شمېر غړیو د اعتراض په ډول د کامران عليزايي د نیولو په اړه د هېواد لویې څارنوالۍ حکم په تړاو د دې شورا دروازه تړلې وه.
د ولایتي شورا یو غړی محمد سرور بهادري وايي، دوی دا دروازه ځکه تړلې ده، چې د دې ولایت د ولایتي شورا د رییس په اړه مرکز ته د دروغو راپور ورغلی دی او لویې څارنوالۍ پرته له کومې پلټنې د هغه د نیولو، ممنوع الخروج او د دندې د ځنډولو حکم صادر کړی دی.
په ورته وخت کې د هرات د ولایتي شورا رییس نه د ملاتړ په پار یو شمېر ځوانانو نن د ولایت مقام ودانۍ ته څېرمه اعتراضیه غونډه وکړه.
اعتراض کوونکیو ویل، چې د ولایتي شورا د رییس په اړه د لویې څارنوالۍ حکم ناسم دی.