د لوګر د ولایتي شورا مرستیال ډاکتر عبدالولي وکیل سلاموطندار ته وویل چې له تېرو ۱۳ ورځو راهیسې طالبانو د ازرې ولسوالۍ کلابند کړېده.
ښاغلی وکیل وزیاتوي چې له تېرې شپې راهیسې سلګونو طالبانو له څلورو خواوو پر ازرې ولسوالۍ بریدونه پیل کړي چې ان د ولسوالۍ د سقوط وېره شته.
د ښاغلي وکیل په وینا، نړۍوالو ځواکونو هم د مرستې په نوم د طالبانو پرځای پر افغان امنیتي ځواکونو او ملکيانو هوايي بریدونه کړي چې ۱۵ پولیس او ۵ ملکیان پهکې وژل شوي او ګڼ نور ټپیان دي.
د ازرې یو اوسیدونکې شهزاده توحیدمل سلام وطندار سره په اړیکې کې پهدې سیمې کې د درنې جګړې پخلی وکړ.
د لوګر امنیې قوماندانۍ ویاند شاهپور احمدزي سلام وطندار ته وویل چې پر ازرې ولسوالۍ د طالبانو بریدونو کې د هغوی ۳۰ کسان وژل شوي.
دی زیاتوي، پهدې جګړه کې ۳ پولیس وژل شوي او ۴ ټپيان دي.
طالبانو هم دعوه کړې چې د ازرې ولسوالۍ ډېرې برخې یې نیولې دي او لسګونه سرتېري یې وژلي.
ازره د لوګر لېرې پرته څه ناڅه غرنۍ ولسوالي ده چې له کابل، پکتیا او ننګرهار ولایتونو سره پوله لري او ډېورند کرښې ته هم نږدې ده.