د فراه ځايي چارواکي پهدې ولایت کې د امنیتي ځواکونو او پوځي تجهیزاتو له کمښته اندېښنه ښيي او له امنیتي بنسټونو غواړي چې له طالبانو سره د مبارزې لهپاره مکانات ورکړي.
د بالابلوک او پشتکوه ولسوالان له سلاموطندار سره خبرو کې د امنیتي ځواکونو د تلفاتو د زیاتېدو مهم لامل د پوځي تجهیزاتو او امنیتي ځواکونو کمښت بولي، وايي چې د طالبانو په پرتله د دوی جګړهییز مهمات کم دي.
دغهراز د ولایتي شورا ځېنې غړي وايي، د فراه ولایت امنیت ورځ تر بلې خرابېږي.
د فراه یو شمېر مدني فعالان او د ولایتي شورا غړي هم د امنیتي ځواکونو له کموالي او په پرمختللو وسلو د دغو ځواکونو نه سمبالښت په اړه اندېښنه څرګندوي، وايي چې د ورځې په تېرېدو سره د دې ولایت امنیتي وضعیت نور هم ترینګلی کېږي.
د فراه ولایتي شورا غړې جمیله امیني او مدني فعال قدرتالله فاروقي خبرداری ورکوي، که دغه ولایت ته امنیتي ځواکونه او پوځي تجهیزات ونهاستول شي؛ طالبان به یو ځل بیا د فراه ښار تر ولکې لاندې راولي.
په همدې حال کې د فراه والي ویاند ناصر مهر هم د امنیتي ځواکونو د تجهیزاتو او تشکیلاتو کمښت مني؛ خو وايي چې ولسوالیو کې د طالبانو خوځښتونو په زیاتېدو سره د فراه والي د ویډیو کنفرانس له لارې لوړپوړیو امنیتي چارواکیو سره خبرې وکړې او د لازیاتو ځواکونو او تجهیزاتو غوښتنه یې ورڅخه وکړه.
د فراه والي تمه ښيي چې لوړپوړي امنیتي چارواکي پهخپلو ژمنو عمل وکړي او دې ولایت ته نور امنیتي ځواکونه او پوځي تجهیزات ولېږي.
په وروستیو کې پهدې ولایت کې د طالبانو بریدونه زیات شوي چې پرون د فراه په بالابلوک ولسوالۍ کې د دې ډلې په برید کې ۱۰ کمانډويي سرتېري او ۸ پولیس ووژل شول.
