.jpg)
غور کې د ۱۱۳ باب ښوونځیو ښوونکیو نن ګهیځ د دې ولایت پوهنې ریاست په مخکې اعتراضیه غونډه وکړه او وروسته يې د پرلت خېمه ووهله. دوی له حکومت د خپلو معاشونو د ورکولو غوښتنه وکړه.
معترض ښوونکي وايي، څه باندې یو کال راهیسې معاشونه نهدي اخيستي او هر ځل چې د غور پوهنې ریاست او ځايي ادارې ته مراجعه کوي؛ د دروغو ژمنې ورسره کوي.
معترضو ښوونکیو خبرداری ورکړ، که معاشونه يې ورنهکړل شي؛ د پوهنې ریاست او ښوونځیو دروازې به وتړي.
خو د غور پوهنې ریاست سرپرست خلیلاحمد مبارز وايي، د دې ولایت د ښوونکیو معاشونو ځکه نهدي اجرا شوي چې د غور ملي امنیت پخواني رییس راپور ورکړیو چې دغه ښوونځي تړلي دي.
.jpg)
د هغه په وینا، تر هغو چې د ملي امنیت خپله ادعا بېرته وانهخلي؛ د ښوونکیو معاشونه نه ورکول کېږي.
پهدې اړه مو د غور ملي امنیت ریاست د نظر اخېستلو خواري هم وکړه؛ خو هغوی خبرو کولو ته چمتو نهشول.
تېر کال د غور ملي امنیت پخواني رییس د بېلابېلو دلایلو له امله راپور ورکړ چې د دې ولایت ۱۱۳ ښوونځي تړلي دي او له مستوفیت ریاست څخه یې وغوښتل، د دغو ښوونځیو د دوسیې تر وروستي کېدو پورې، د ښوونکیو معاشونه ور نهکړي.
