د غور ځېنې اوسېدونکي وايي، پهدې ولایت کې د کامایر هوايي شرکت پروازونه بند شوي دي او په دې ولایت کې بل هېڅ هوايي شرکت هم فعالیت نهلري.
دوی وايي، دا د دې سبب شویدی چې د دې ولایت اوسېدونکي د ناروغانو د لېږد او کاري پروګرامونو د ترسراوي په برخه کې له ستونزو سره مخ شي.
د کابل په انټرکانټېنېټل هوټل باندې وسلهوالې نښتې کې د کامایر هوایي شرکت د څوو پيلوټانو او کارکوونکیو له وژل کېدلو وروسته دا شرکت مجبور شو چې څوو ولایتونو ته خپل پروازونه وځنډوي.
د غور دوو اوسېدونکیو صالحمحمد شېرزي او محمدهاشم فیضي سلاموطندار ته وویل چې د امنیتي ستونزو او مواصلاتي لارو خرابوالي هرات ـ کابل ته د اړینو کارونو او ناروغانو په لېږدولو کې له داسې ستونزو سره مخ کړي چې د یو یا نیم ساعت مزل په دوو شپو او ورځو کې کوي.
دوی له اړوندو ادارو غواړي چې د دوی دې ستونزې ته جدي پام وکړي او هوايي شرکتونو ته د پروازونو زمینه برابره کړي.
ورته وخت کې د غور ځايي ادارې مسوولان وايي، دوی هڅه کوي چې په دې ولایت کې بیاځلي هوايي پروازونو شروع شي. وايي، ټاکل شوې تر راتلونکیو ۴ میاشتو پورې یو له هوايي شرکتونو کابل ـ غور او غور ـ هرات ته خپل پروازونه پيل کړي.
د غور د والي ویاند عبدالحی خطیبي وايي، کامایر شرکت د فني او حقوقي ستونزو له کبله نه توانېدلی بیاځلي پروازونه پیل کړي.
د کامایر هوايي شرکت سوداګریز مسوول سلیمان عمر د پروازونو بېرته نه پیلولو لامل د الوتکو کموالي ګڼي او وايي، دغه شرکت په پام کې لري ډېر ژر د خپلو الوتکو شمېر زیات کړي او په پلان کې ده چې بېرته لرو پرتو ولایتونو ته بیاځلي پروازونه پيل کړي.
