په شېرخان بندر کې د نږدې یونیم زر جریبه دولتي ځمکې په غصب کې د مرستې په تور د دغه بندر د تصدۍ رییس دنده ځنډول شوې ده.
د کندوز ولایت د څارنوالۍ رییس عارف مبشر سلام وطندار ته وویل، چې د شېرخان بندر د تصدۍ رییس امام محمد سرشخي د افغانستان او تاجکستان په سرحدي سیمه کې د تصدۍ د یوزرو او ۴۹۵ جریبه ځمکې د غصب، په هغه سیمه کې د استوګنې کورونو د جوړولو او د دولتي ځمکې د پېر او پلور په برخه کې په امر ورکولو تورن دی.
د څارنوالۍ د رییس پر خبره، امام محمد سرشخي د دغو تورونو په برخه کې ځواب ورکولو ته نه دی، حاضر شوی او بلاخره د محکمې له خوا یې دنده ځنډول شوې ده.
له شېرخان بندر څخه یوې سرچینې د نوم نه خپرولو په شرط سلام وطندار ته وویل، چې د شېرخان بندر د تصدۍ رییس دولتي جایدادونه په کرایې او اجارې ورکړي دي.
په ورته وخت کې امام محمد سرشخي دغه تورونه ردوي او وايي، د څارنوالۍ ټول استعلامونه یې ځواب کړي او زیاتوي، چې د ده په موجویت کې د دندې له پيل تر اوسه یوه بسوه ځمکه هم په دې تصدۍ کې غصب شوې نه ده.
د شېرخان بندر د تصدۍ رییس وايي، د ۱۳۷۸ کال د فرمان پر بنسټ د شېرخان بندر د تصدۍ پر جایداد یوزرو او ۴۰۰ جریبه ځمکه نوره هم وراضافه شوې، چې دغه ځمکې په هماغه وخت کې د زورواکو له لوري غصب شوي او د بېرته اخیستلو له پاره یې د سیمه ییز حکومت هڅو نتیجه نه ده ورکړې.
په کندوز ولایت کې د شېرخان بندر تصدۍ، یوه دولتي تصدۍ ده، چې د سوداګرو له پاره په بندر کې اسانتیاوې برابروي.
