د افغانستان سوداګرۍ او صنایعو خونې چارواکي وايي، په کابل کې د نړیوالې سوداګرۍ خونې پرانیستلو له کبله د خصوصي سکتور اړیکې نورې هم پراخیږي.
د سوداګرۍ خونې د نړیوالو اړیکو رییس اذرخش حافظي وویل، چې د دغې نړیوالې سوداګرۍ خونې په پرانستلو سره به د سیمې له هېوادونو سره د پانګونې او سوداګرۍ په برخه کې د افغانستان اړیکې پراخې شي.
اذرخش حافظي وايي، د افغانستان خصوصي سکتور له ۵۱ هېوادونو سره ګډې سوداګریزې اړیکې لري؛ خو بیا هم حکومت له دغو هېوادونو سره هېڅ ډول د راکړې ورکړې اړیکه نه لري.
حافظي هیله وښوده، چې د دغې نړیوالې خونې په پرانستلو سره به افغانستان د سیمې او نړۍ له یو شمېر هېوادونو او شرکتونو سره ونښلول شي.
اذرخش حافظي زیاتوي، اوسمهال په کور دننه د افغانستان سوداګرۍ حجم د نورو هېوادونو په پرتله ۱۰سلنه زیات دی.
دغه راز، په دې غونډه کې اجرایوي رییس عبدالله عبدالله په هېواد کې د خصوصي سکتور فعالیت وستایه او زیاته يي کړه، چې له ټولو ستونزو او ناخوالو سره، سره بیاهم بېلابېلو برخو کې پانګونه شوې ده.عبدالله له خصوصي سکتور سره د حکومت د مرستې کولو ډاد ورکړ.
د سوداګرۍ نړیواله خونه یا IIC د نړۍ په ۱۳۰ هېوادونو کې ۶ نیم میلیونه غړي لري، چې د نړۍ په ۹۰ هېوادونو کې يې نماینده ګي فعالیت لري.
افغانستان ۸۲ کاله مخکې د نړیوالې سوداګرۍ خونې غړیتوب ترلاسه کړی و، خو د دغې خونې نماینده ګې په افغانستان کې پرانیستل شوې نه وه.
