د بشري حقونو نړيوال څار ادارې ويلي، افغانستان ته د پخواني جنګسالار زرداد له راتګ وروسته د ده د جنايتونو په اړه د شاهدۍ ورکوونکيو ژوند په خطر کې دی.
دغه سازمان د يوی خبرپاڼي په خپرولو سره د افغان او برېټانوي حکومت نه غوښتي دي، چې د زرداد له راتګ سره د بې ګناه وګړیو ژوند له خطر سره مخ نه شي.
زرداد فریادي د حزب اسلامي ګوند مشهور قوماندان و.
سرور زرداد فريادي په برېټانيې کې له ۱۱ کاله بند تېرولو وروسته تېره چهارشنبې د ډېسمبر پر ۱۴ د نړيوالو پولیسو «انټرپول» له خوا د کابل په حامد کرزي نړيوال ډګر کې ملي امنيت ته وسپارل شو. د ده يو شمېر پلويان د ښه راغلاست له پاره هوايي ډګر ته هم ورغلي وو؛ خو د امنيتي ځواکونه له خوا زرداد ناڅرګند ځای ته ولېږدول شو.
دغه پخواني جنګي قوماندان د کابل او جلال اباد تر منځ د سروبي په سيمه کې له مسافرو، دولتي او مرستندويه ټولنو له موټرو څخه په لوټمارۍ مشهور او په همدې جرم مجرم بلل شوی او د ټولټال ۱۶ کاله بند د سزا نه يي ۵ کاله لا هم پاتې دي.
د بشري حقونو نړيوال څار ادارې د برېټانیې له حکومته غوښتي، چې د زرداد د جنايتونو شاهدي ورکوونکیو ته دې یا د ويزه ورکړي او يا دې د هغوی د خونديتوب تضمین وشی.
په خبرپاڼه کې له افغان حکومته هم غوښتل شوي، چې د زرداد فعاليتونو تر څار لاندې ونيسي، چې بې ګناه انسانانو ته زيان نه ورسوي.
د دې ادارې مشرې څېړونکې پيټريشيا ګروسمن ويلي، چې په برېټانیې کې د زرداد محکمه او بيا ورته ورکړل شوې جزا دا څرګندوي چې جنايتکار په هېڅ ځای کې خوندي نه شي پاتې کېدلی؛ خو د ده بېرته افغانستان ته سپارل د ډېرو خلکو ژوند له خطر سره مخ کوي. د يادونې ده، چې زرداد په ۱۹۹۶ ميلادي کال کې په جعلي اسنادو برېټانیې ته وکوچېد؛ خو هلته په ۲۰۰۳ ميلادي کال کې وپېژندل شو او د قانون منګولو ته وسپارل شو.
کابل ته د زرداد له راتګ سره په خواله رسنیو کې د هغه د راتګ او جنایتونو په اړه خورا غبرګونونه راپورته شول.
