بالاخره نن په کابل کې له میاشتو انتظار وروسته د افغانستان، چین او پاکستان درېاړخیزه غونډه د درېیوو واړو هېوادونو د بهرنیو چارو وزیرانو په ګډون جوړه شوه.
د افغانستان د بهرنیو چارو وزیر صلاحالدین رباني پهدې غونډې کې وویل چې په افغانستان کې ثبات او امنیت، د سیمې امنیت پورې تړلی دی او په همدې موخه یې د تروریزم د لهمنځهوړلو لهپاره جدي تدبېرونه نیولي دي.
د ښاغلي رباني په خبره،افغانان سوله غواړي او هغوی پهدې غونډې کې د درېیوو هېوادونو ترمنځ د امنیتي او سرحدي مرستو یو هوکړهلیک لاسلیک کړ چې په رڼا کې به یې د امنیت او له ترورېزم سره مبارزه، اقتصادي پراختیا او سیمهيیز اتصال او د مصالحې او سیاسي اعتماد را منځتهکولو په برخه کې کار کوي.
د بهرنیو چارو سرپرست وزیر وايي، سولې ته د رسېدو لهپاره د افغانستان او پاکستان د پلان پلي کول؛ پهدې غونډې کې د دوی د بحث بل اړخ و او له ګاونډي پاکستانه یې وغوښتل چې د سولې په پروسه کې له افغانستان سره مرسته وکړي.
د پاکستان د بهرنیو چارو وزیر شاهمحمود قریشي د کابل او اسلامآباد ترمنځ د اعتماد فضا نهشتوالي ته په اشاري سره وايي، افغانستان ته د راتلو څخه یې موخه په درې اړخیزې غونډې کې د برخه اخېستلو تر څنګ د دواړو هېوادونو ترمنځ د اعتماد رامنځتهکول، د افغانستان د سولې پروسې ته د طالبانو هڅونه او د دواړو هېوادونو ترمنځ اقتصادي پراختیا ده.
د ده په خبره، دی دلته راغلی چې د افغانستان جګړه کې دخيلې ډلې وهڅوي چې د افغانستان له سولې سره یو ځای شي او ډاډ ورکوي چې پاکستان خپل نقش لوبوي او کوښښ کوي چې د سولې پروسه ښه پرمخ ولاړه شي.
د پاکستان د بهرنیو چارو وزیر د سولې په خبرو کې د چین هېواد رول د ارزښتوړ ګڼي او وايي، افغانستان، پاکستان او چین د تروریزم قربانیان دي او دوی ژمن دي چې په ګډو هڅو به له دې پدیدې سره د مبارزې په برخه کې کار کوي.
د چین د بهرنیو چارو وزیر وانګ یي درېاړخيزې غونډې په افغانستان کې سولې ته د رسېدو ښه فرصت په ګوته کوي او وايي، هڅه کوي چې طالبان د خبرو ـ اترو مېز ته راوبلي.
د وانګ یو په خبره، چین او پاکستان د افغانانو په رهبرۍ د سولې له پروسې ملاتړ کوي.
د چین د بهرنیو چارو وزیر همدارنګه وویل چې افغانستان او پاکستان پهدې غونډې کې د اړیکو د ښهوالي لهپاره موافقې ته رسېدلي دي. هغه له افغانستانه وغوښتل چې د پاکستان ـ چین له هوايي دهلیزه هم ګټه پورته کړي.
