د خبریالانو د دوسیو د څېړلو عدلي او قضايي کمېټې د کار پایله نن (سه شنبه می ۳۱مه) اعلان شوه. د ازادو رسنیو د ملاتړ بنسټ (نی) رییس عبدالمجیب خلوتګر په کابل کې خبري غونډې ته وویل، چې دې کمېټې تر اوسه پورې دوه غونډې کړي دي او د خبریالانو پر وړاندې د تاوتریخوالي ۶۷۹ دوسیې یې څېړلي دي.
خلوتګر وویل، چې په څېړل شویو دوسیو کې ۶۰ پېښې د قتل، ۴۶پېښې د ټپي کېدو، ۲۲۲پېښې د وهلو او ټکولو، ۸۴ پېښې د نیول کېدلو، ۲۹ پېښې د برمته کېدو او ۲۳۸ پېښې هم خبریالانو ته د مرګ ګواښ کول شامل دي.
نوموړی وايي، چې له ۶۷۹ دوسیو څخه ۲۵۲ یې د زیات وخت نیولو له امله څنګه ته شوي دي او ۴۲۷ دوسیې د څېړلو له پاره اړوندو بنسټونو ته لېږل شوي دي.
د نی اجرایوي رییس وویل، چې د ملي امنیت لوی ریاست، د کورنیو چارو وزارت، د بهرنیو چارو وزارت او لویه څارنوالي به دغه دوسيې د ولسمشرۍ ماڼۍ سره په همغږۍ په ټاکل شوي وخت کې تعقیبوي.
د خبریالانو د دوسیو د څېړلو عدلي او قضايي کمېټه تېر کال د ولسمشر د فرمان پر بنسټ جوړه شوه.
په دې کمېټه کې د ملي امنیت، لویې څارنوالۍ، د بهرنیو چارو وزارت، د اطلاعاتو او کلتور وزارت، د خبریالانو د فدراسیون او رسنیو ۵ غړي شامل دي.
د دې کمېټې د څېړنو پایله په داسې حال کې خپرېږي، چې خبریالان د رسنیو حقونو مدافع بنسټونو له کړنو شکایت کوي او د دغو بنسټونو کارونه د قناعت وړ نه بولي.