جرمني هېواد ته تازه ورغلي پناه اخیستونکو ته د دې هېواد د خلکو له لوري تود هر کلی وویل شو.
وروسته له هغې، چې د جرمني مونیخ ښار پولیسو د ټوېټر په رسمي پاڼه کې اعلان وکړ، پناه اخیستونکو سره مرسته کول ازاد دي، د المان ښاریانو د بېلا بېلو ډالیو په ورکولو سره پناه اخیستونکو ته ښه راغلاست وویل.
د مونیخ ښار پولیسو دا ګومان نه کاوه، چې له اعلانه یو ساعت وروسته دې، پناه اخیستونکي د خلکو له دومره تود هر کلي سره مخ شي.
دغه ښاریانو په خپله خوښه ورغلو کډوالو ته خواړه، د ماشومانو له پاره یې کالي او د څښاک له پاره توکي وروړل، چې په دې کار سره د المان پولیس حیران شول.
د مرستو او ډالیو شمېره دومره زیاته شوه، چې پولیسو یې د ودرېدو غوښتنه وکړه.
د مونیخ ښار پولیسو په ټوېټر پاڼه کې ولیکل، د قطار په تم ځای کې د خلکو خوښیو موږ ته بې حده خوښې راکړې ده، خو له مرسته کوونکو غوښتنه کوو، چې مرستې بسنه کوي او نورې مرستې دې بندې کړي.
د جرمني لومړۍ وزیره انګلا مرکل د پناه اخیستنې خلاف نظر په اړه اندېښنه وښوده او د جرمني له خلکو یې په ټینکار سره غوښتنه وکړه، چې د هغو خلکو له ډلې سره یوځای نه شي، چې د پناه اخیستنې خلاف دي.
کله چې د مجارستان پولیسو پناه غوښتونکو ته د لویدېځې اروپا په لور د تګ اجازه ورکړه، ډلې- ډلې پناغوښتونکي المان ته لاړل.
د المان مونیخ ښار د قطار اصلي تم ځای د زرګونو پناه غوښتونکو شاهد و، چې له مجارستان جرمني ته راغلي و.
د پناه غوښتونکو زیات شمېر د عراق او سوریې اوسېدونکي و.
هغه پناه غوښتونکي، چې جرمني ته تللي دي، نه پوهیږي، چې برخلیک به یې څه وي، خو د یو امن ځای ته رسېدلي او خوښي څرګندوي.
خو په ورته وخت کې تېره ورځ هغه شمېر پناه غوښتونکي، چې غوښتل یې جرمني ته لاړل شي د مجارستان پولیسو قطار ته د ورتګ اجازه ور نه کړه.
ویل کیږي، چې جرمني یواځېنۍ هېواد دی، چې زیات شمېر پناه غوښتونکو ته قبولي ورکوي.
د روان کال په لومړیو ۳ میاشتو کې ۷۳ زره پناه اخیستونکي جرمني ته تللي دي، چې دا شمېره په بریتانیا کې د پناه ورکړل شویو خلکو د شمېرې په پر تله حیرانونکې ده.
په بریتانیا کې ۷۳۰۰ تنو ته پناه ورکړل شوې ده.
