شاوخوا یو میاشت مخکې ناپېژندو کسانو د غور په مرکز فېروز کوه ښار کې د سرحد په نوم سیمهییزې اف،ام راډیو پر ودانۍ برید وکړ او د تېلو په واسطه يې د خبر خونې په ګډون د دې راډیو ټول وسایل وسوځول.
د سرحد راډیو د خپرونو مدیر احمد شاه موحد سلاموطندار ته وویل، د دې راډیو له سوځېدو وروسته يې هڅه کړې چې خپلې خپرونې بېرته پیل کړي خو د بودیجې نهشتوالي او د ملي او نړیوالو بنسټونو نه پاملرنې لهامله پر دغه کار نه دي بریالي شوي.
ښاغلي موحد پر دې راډیو د برید عاملینو پېژندلو او نیولو کې د امنیتي بنسټونو پر نه همکارۍ نیوکه کوې او زیاتوي په دې اړه پولیسو څه نه دي کړي.
غور کې د خبریالانو خوندیتوب کمېټې مسوول غلام رباني هدفمند هم پر سرحد راډیو د برید نه څېړلو په اړه د اندېښنې په ښودلو سره وایي چې که د دې راډیو خپرونې بېرته پیل نه شي د غور رسنیو زیاتره کارکوونکي یا له کاره ډډه کوي او یاهم سانسور ته مخه کوي.
خو د غور د والي ویاند عبدالحی خطیبي وايي چې امنیتي ځواکونو ته هدایت ورکوی شوی چې پر سرحد راډیو د برید عاملین ونیسي.
د سرحد سیمهییزې اف،ام راډیو له څلورو کالو راهیسې د غور په مرکز فېروز کوه ښار کې په فرهنګي، سیاسي، ټولنیزو، دیني او سپورتي برخو کې فعالیت کولو.
