د کورنیو چارو وزارت ویاند طارق ارین وايي، د ملي امنیت ځواکونو بېګاه په کابل کې د امن او عامه نظم مخکینی قوماندان زمری پیکان نیولی دی.
ولسمشر محمداشرف غني د تېر کال په قوس میاشت کې د فساد پر وړاندې د مبارزې په کلنۍ غونډه کې کورنیو چارو وزارت ته لارښوونه کړې وه چې ژرترژره زمری پیکان ونیسي.
ولسمشر غني ویلي و چې د نوموړي نه نیول کېدو د فساد پر وړاندې د افغانستان سیاسي اراده او شهرت له پوښتنې سره مخ کړی دی.
کورنیو چارو وزارت هاغه مهال ويلي و چې اړوندو برخو ته یې لارښوونه کړې چې ژرترژره د امن او عامه نظم مخکیني قوماندان د نیولو لپاره اقدام وکړي.
د فساد پر وړاندې د درنو جرمونو عدلي او قضايي مرکز د ۱۳۹۶ کال په قوس میاشت کې زمری پیکان د وظیفوي واکونو نه د ناوړې ګټې اخیستو او د یوه کس په وژلو کې له خپل زوی سره د همکارۍ په تور په اته کاله او شپږ میاشتو بند محکوم شو.