د افغانستان کرکټ ملي لوبډلې د پلورل شویو یو شمیر لباسونو څخه ترلاسه شویو پیسو په مټ پېرل شوي خوراکي توکي د مرستې په توګه په کابل کې اړینو کورنیو نو ته ډالۍ شوې.
دافغانستان کرکټ بورډ د یوې خبرپاڼې په خپرولو سره وایي، چې دغه پېسې د اسټرالیا او نیوزیلینډ په کوربتوب د ۲۰۱۵ کال ۵۰ اوریزه کرکټ نړیوال جام سیالیو پرمهال داسټرالیا میشتو افغانانو له خوا د کرکټ ملي لوبډلې له پاره د برابرې شوې لمانځغونډې پرمهال د ملي لوبډلې د یو شمیر پیرل شویو لباسونو څخه ترلاسه شوې وې، چې د خوراکي توکو په وېش سره اړینو کورنیو ته وسپارل شوې.
کرکټ بورډ وایي، چې افغان کرکټ بورډ د لباسونو په مټ ترلاسه شوې پیسو باندې یو شمیر خوراکي توکې وپیرل او هغه یې د کرکټ بورډ په انګړ کې په بې وزلو کورنیو و ویشل.
د کرکټ بورډ خبرپاڼې د خپل عمومي مشر نسیم الله دانش او اجرایوي مشرشفیق الله ستانکزي له خولې ليکي، چې د خیرښیګڼې په دې کار سره د کرکټ ملي لوبډلې لوبغاړي هم وستایل چې د بی وزلو ترشا ولاړ دي.
د کرکټ ملی لوبډلې د لباسونو د پلورلو په پایله کې د راټولو شویو پېسو په مټ پیرل شوي خوراکي توکي په هېواد کې د (ون ویژن ایډ) موسسې په مټ د شوي سروې له مخې په اړینو کورنیو و ویشل شول.
د یادونې وړ ده، چې دا لومړی ځل وو، چې د کرکټ ملي لوبډلې اتلان د هېواد بې وزله کورنیو سره د خیر ښیګڼې په موخه د خپلو نړېوالو سیالیو تاریخي لباسونه په خپلو مینه والو پلوري او ترلاسه شوي پیسې یې بیا د مرستی په بڼه پر بې وزلو ویشل کیږي.
