د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد تېره ورځ له افغان ولسمشر محمداشرف غني سره لیدلي دي.
خلیلزاد له دې لیدنې وروسته پر خپلې ټویټرپاڼې لیکلي چې د سولې خبرو اترو په دغه پړاو کې د افغان سولې پروسه نوي پړاو ته ننوځي چې افغانان باید پهکې ډېر ښکېل شي.
د ارګ یوې خبرپاڼې هم لیکلي چې د امریکا او طالبانو ترمنځ د خبرو په اووم پړاو کې د بینالافغاني خبرو پیل ته تمې زیاتې شوې دي.
په همدې حال کې یوشمېر سیاسي شنونکي هم باور لري چې د سولې خبرو په اووم پړاو کې به طالبان له افغان دولت سره د سولې خبرو ته چمتو شي.
سیاسي شنونکی محمود حیدري وایي، د سولې خبرو په شپږم پړاو کې افغان حکومت او افغانان نه وو او همدا لامل و چې ښې پایلې یې نهلرلې. د نوموړي په وینا، ښايي تر دې وروسته افغان حکومت د سولې په پروسه کې اساسي رول ولوبوي.
- قطر؛ د سولې خبرو اترو کې لا چټک پرمختګ ته اړتیا ده
- قطر کی د طالبانو او امریکایی پلاوي ترمنځ خبرې بیا پیل شوې
پخوانی طالب چارواکی وحید مژده هم د امریکا او طالبانو ترمنځ اووم پړاو خبرو ته هیلهمند ښکاري. نوموړی وایي، د افغان حکومت له لوري د شاوخوا ۹۰۰ طالبان بندیانو خوشې کول هم ښايي پر یادې پروسې مثبت اغېز وکړي.
په کابل کې د امریکا سفارت یوې خبرپاڼې هم د امریکا او طالبانو د خبرو اووم پړاو حساس بللی او د سولې په بهیر کې یې د افغانانو پر حضور ټینګار کړی دی.
بلهخوا د سولې عالي شورا ویاند غفوراحمد جاوید هم وايي چې ډېر ژر به بینالافغاني خبرې اترې پيل شي. د نوموړي په وینا، اوس د هېواد، سیمې او نړۍ په کچه اجماع جوړه شوې او تمه ده چې طالبان به دا ځل له افغان حکومت سره مخامخ خبرو او اوربند ته غاړه کېږدي.
د امریکا د بهرنیو چار وزارت تر دې وړاندې اعلان کړی و چې د سیمې هېوادونو ته د زلمي خلیلزاد تازه سفر د جون تر ۲۸ نېټې دوام کوي چې نوموړی به پهدې موده کې افغانستان، پاکستان، قطر، بلجیم، المان او متحده عربي اماراتو ته لاړ شي.
د دغو لیدنو موخه د امریکا او طالبانو ترمنځ د سولې په اړه د اووم پړاو خبرواترو پیل ته چمتووالی ښودل شوی.