د کرېکټ پخواني یو لوبغاړي په نوښت افغانستان کې د افغان بلیډ په نوم د ورزشي وسایلو تولید لومړنۍ کارخانه پرانیستل شوه.
د ورزشي توکیو دا کارخانه په ننګرهار ولایت کې جوړه شوې او د غونډې پرمهال یې تولید شوي توکي وېش او نندارې ته وړاندې کړل.
د کرېکټ ملي لوبډلې پخواني لوبغاړي او د یاد شرکت مسوول سرتاج شاهدزي سلاموطندار سره په خبرو کې وویل، اوسمهال یوازې د کرېکټ لوبې وسایل تولیدوي او ډېرژر به د نورو ورزشي لوبو د وسایلو په تولید هم پيل وکړي.
نوموړی وايي، ورزش او په ځانګړې توګه کرېکټ په افغانستان کې پرمختګ کړی خو لاهم د لوبغاړو د اړتیاوړ توکي په ټیټ کیفیت له ګاونډیو هېوادونو افغانستان ته راوړل کیږي. زیاتوي، د لوړ کیفیت وسایل به د سیمې هېوادونو پرتلې په کمه بیه وړاندې کړي.
د افغان بلیډ په پرانیست غونډه کې د ولس استازو او د ورزشي ادارو مسوولانو د دغې کارخانې پيل یو ښه زېری یاد کړ او له لوبغاړو او ورزشي ادارو یې وغوښتل له خپلو ملي تولیداتو ګټه واخلي.
د بدني روزنې ریاست مرستیال میرویس بهاوي او د کرېکټ بورډ د پرمختیایي څانګې غړي شرف الدین شاکر وویل، که افغان بلیډ په لوړ کیفیت ورزشي توکي برابر کړي، دوی به د ولسمشر غني د فرمان په اساس چې ټولې دولتي ادارې باید له ملي تولیداتو ګټنه وکړي؛ خپلو لوبډلو ته کورني تولید شوي وسایل واخلي.
اوسمهال د هېواد ورزشي ادارو لهپاره لباسونه او ورزشي توکي له هېواده نه بهر نړۍوال شرکتونه برابروي.
