پاکستاني رسنۍ وایي، چې ښایي پخوانی پاکستانی کپټان سلمان بټ د پاکستان کرکټ ملي لوبډلې له پاره د اسټرالیا خلاف سیالیو ته غوره شي.

د "اردو پواینټ" ویبپاڼې د راپور له مخې، په ټیسټ کرکټ کې پاکستانۍ کرکټ ملي لوبډله د اوپنینګ ستونزې لري او ښایي سلمان بټ بېرته پاکستانۍ ملي لوبډلې ته راستون شي.

د پاکستانۍ کرکټ ملي لوبډلې هیڅ یوه اوپنر بیټسمین تراوسه د انګلستان خلاف په ترسره شویو ۳ ټیسټ لوبو کې په سلیزې جوړولو بریالی شوی نه دی او د دې لوبډلې د کپتان او روزونکې ډلې ستونزې یې زیاتې کړي دي.

سلمان بټ په ۲۰۱۰ م ز کال کې د انګلستان په سفر کې د محمد اصف او محمد عامر ترڅنګ د پیسو په بدل کې درغلي وکړه، چې د ۱۰ کلن کرکټ بندیز سره مخ شوی وو.

سلمان بټ د افغانستان کرکټ بورډ له خوا روانه اوونۍ د ۱۰ زرو امریکایي ډالرو په بدل کې د ۷ نورو پاکستاني لوبغاړو ترڅنګ په ۴ م پړاو شپږیزه شل اوریزه کرکټ سیالیو کې د لوبېدو په موخه افغانستان ته راغی.

هغه اوسمهال د میرویس اشرف په کپتانۍ کې د امو نهنګان لوبډلې په ګټه لوبیږي، چې په لومړۍ لوبه کې يې نیمه سلیزه جوړه کړه، خو په پوره ۲۰ اورونو کې یې لوبډله هدف ته و نه شوای رسولای.

د پاکستان اردوپواینټ د راپور له مخې، سلمان بټ په همدې موخه په دې وروستیو کې د پاکستاني کرکټ بورډ د ټاکوونکي ډلګۍ له مشر انضمام الحق سره هم لیدنه کړې ده.

راپور کې راغلي، انضمام الحق سلمان بټ ته لارښوونه کړې ده، چې زیات نه زیات د پاکستان په ۴ ورځنیو کرکټ سیالیو کې ځان مصروف وساتي او د نوموړي حوصله یې زیاته کړې ده.

که څه هم په رسمي توګه تراوسه د اسټرالیا سفر له پاره نه پاکستانۍ لوبډله اعلان شوې ده او نه هم پاکستاني کرکټ بورډ د سلمان بټ د راوستو په اړه څه ویلي، خو د پاکستان ورزشي خبریال وحید خان بیا دعوه کړې ده، چې سلمان بټ به د اسټرالیا سفر له پاره په پاکستانۍ کرکټ لوبډله کې غوره شي.

سلمان بټ اوسمهال ۳۱ کاله عمر لري، چې له ۲۰۰۲م ز کال څخه تر ۲۰۱۰ م ز کال پورې د پاکستانۍ کرکټ ملي لوبډلې له پاره په ۳۳ ټیسټ ، ۷۸ یو ورځنیو او ۲۴ نړیوالو ۲۰ اوریزه لوبو کې ولوبید، چې ۱۱ سلیزې په خپل نوم ثبت لري او د کپتان ترڅنګ یو ښه اوپنر بیټسمین هم شمیرل کیده.