د ولسمشر لومړی مرستیال جنرال عبدالرشید دوستم د فارياب د غورماچ ولسوالۍ ژغورنې له پاره د ۲۰۹ شاهين قول اردو د قومندان جنرال محمد کټوازي تر مشرۍ لاندې چاڼيز عمليات پيل کړي.
د ولسمشر لومړی مرستیال جنرال عبدالرشید دوستم فاریاب کې د دولت ترولکې لاندې سیمو د سقوط یو لامل د یو شمیر قوماندانو له خوا د پوستو او پوځي تجهیزاتو پلورل بولي.
سره له دې، چې جنرال دوستم د کوم چا نوم وا نه خیست خو وايي، هر ملکي او پوځي مسوول چې په دنده کې غفلت وکړي عدلي او قضايي بنسټونو ته به معرفي شي.
دوستم زیاتوي، چې د غورماچ ولسوالۍ د سقوط څیړلو له پاره یې دوه څارنوالان هم فاریاب ته راوستي، تر څو دغه مسله په قانوني ډول وڅېړي.
د ولسمشر لومړۍ مرستیال تیره شپه ناوخته په غورماچ کې چنایانو پورې اړوند کمپ کې وویل، چې د غورماچ ولسوالۍ د بیرته نیولو په عملیاتو کې ۱۰ طالبان وژل شوي او له ۵۰ زیات ټپیان دي.
د جنرال دوستم پر وینا، د نښتو په پایله کې په عملیاتو کې شامل ۱۵ ځواکونه چې پولیسو ملي اردو، پاڅونکونکي او د هغه ساتونکي شامل دي هم وژل شوي او ۱۸ نور ټپیان دي.
په همدې حال کې چنایانو پورې اړوند کمپ کې د ملي اردو ځواکونه، چې له ۲۰ ورځو راهیسې د طالبانو په کلابندۍ کې دي په مرکز کې د حکومتي مسولینو په بې غورۍ تورنوي.
د ملي اردو د دغه سرتیري پر وینا، د هغوی ټول تجهیزات او خوراکي توکي خلاص شوي وو او د مقاومت په وروستیو شیبو کې و چې د ولسمشر لومړۍ مرستیال د هغوی کلابندي ماته کړه.
د ولسمشر لومړی مرستیال وايي، چې د فاریاب غورماچ ولسوالۍ د طالبانو د جګړې مشري پاکستاني شیخان پرغاړه لري او پروینا يي، اوسمهال له ۶۰۰ زیات طالبان په دغې ولسوالۍ کې جګړه کوي.
د فاریاب غورماچ ولسوالۍ سقوط د ولسمشر لومړی مرستیال جنرال دوستم د څلورم ځل له پاره دغه ولایت ته د تگ له پاره مجبور کړ، چې اوسمهال د راپورونو له مخې په غورماچ کې د امنیتي ځواکونو سخت عملیات روان دي او امنیتي ځواکونه د پرمختګ په حال کې دي.
