افغانستان شفافیت مؤسسهسی و شفافیت ادارهسینینگ ایتیشیچه، دنیانینگ اینگ فساد مملکتلرینینگ رویخطیده افغانستان 4 پله قولهب اوشبو رویخطنی تورتینچی اورنیده قرار تاپدی. اولرگه کوره، فسادگه قرشی کورهشده حکومت حرکتی غیر مستقل و سیاسی ایکن. سیاسی دقتسیزلیک و مدنی ادارهلرنینگ مصلحتلریگه دقت قیلینمهگنی سبب، ملی بیرلیک حکومت 4 پله قولهگن. اوتگن ییل افغانستان اوشبو رویخطنی 8- اورنیده قرار تاپگن ایدی.
بوگون کابلده خبری بیر ییغین اوتکزگن افغانستان شفافیت مؤسسهسی و شفافیت ادارهسینینگ ایتیشیچه، خلق ارا شفافیت مؤسسهسینینگ فسادنی تیکشیریش رویخطیده افغانستان 4 پله قولهشی اداری فسادگه قرشی کورهشده حکومتنینگ کوچسیزلیگینی کورستهدی.
افغانستان شفافیت ادارهسی باشلیغی سید اکرام افضلینینگ ایتیشیچه، مملکتده اداری فسادگه قرشی کورهش وضعیتی یخشی ایمس و شونینگدیک، فساد کوپیماقده دیر.
افضلیگه کوره، اداری فسادگه قرشی کورهش نامیگه ایجاد ایتیلگن ادارهلر یالغیز پول قولگه کیریتهدی و حاضرگچه فسادگه قرشی کورهشده هیچ بیر ایجابی ایش قیلمهگن.
اونینگ کوپهیتیریشیچه، ملی بیرلیک حکومت دورانیده ایجاد ایتیلگن ادارهلر، جملهدن معلوماتگه قول تاپیشدن نظارت قیلیش کمیسیون و فسادگه قرشی کورهش عدلی مرکزی هیچ قچان مالی و فنی نقطهای نظردن دییرلیچه حمایت قولگه کیریتمهگن و بو موضوع مذکور ادارهلرنی کوچلنتیریشده حکومتنینگ ظرفیتسیزلیگینی کورستهدی. شونینگدیک او، فسادگه قرشی کورهش ادارهلرنی ایشلریده حمایت قیلیووچی مملکتلرنینگ ارهلشووینی اوشبو ادارهلرنینگ ناکام لیگینی باشقه بیر دلیلی دیب بیلهدی.
عین حالده، افغانستان شفافیت مؤسسهسی رهبرلیک اعضاسی عینالدین بهادرینینگ ایتیشیچه، اداری فسادگه قرشی کورهشده ملی بیرلیک حکومت ناکام بولگن؛ چونکه امنیتی ادارهلر، باش قارهلاوچیلیک و باشقه ادارهلر ارگ تامانیدن باسقین آستیده دیر.
افغانستان شفافیت ادارهسینی باشقه بیر اعضاسی ناصر تیمورنینگ ایتیشیچه، حکومت ییریک رسمیلرینی تصدیقلشده و جایلشتیریشده نمایندهلر کینگشینینگ قولی بارلیگی سبب، فساد کینهیگن.
بیراق، کابلده خبری ییغین اوتکزگن جمهورلیک ریاستی مطبوعات دفتری سرپرستی شاهحسین مرتضوینینگ ایتیشیچه، ادارهلرده فساد موجودلیگی حقیقت دیر، لیکن اولر، بو موضوعگه قرشی کوره شگه دوام بیرهدی.
افغانستان شفافیت ادارهسی، فسادگه قرشی جدی شکلده کورهشیلیشی اوچون فسادگه قرشی کورهش ایرکین کمیسیون و معلوماتگه قول تاپیش کمیسیون ایجاد ایتیلیب، ینگی قانونلر تصدیقلنیب و حاضرگی معلوماتگه قول تاپیش قانون لغو ایتیلیشینی طلب قیلدی.
