دایکندی ولایت کینگشی اعضالریدن بیرقطاری نینگ سلاموطندارگه ایتیشیچه، طالبان گروهی هلمند و ارزگان ولایتلریدن جنگریلرینی دایکندی چیگرهسیده توپلماقده و بو گروه نینگ مقصدی، دایکندی نینگ کجران، ناوه میش و کیتی تومنلرینی سقوط بیریش دیر.
دایکندی ولایت اعضالریدن بیرقطاری نینگ سلاموطندارگه ایتیشیچه، دایکندی و هلمند ولایتلریده طالبان گروهی نینگ ناملنگن والیلری بویروغلریده بولگن جنگریلرینی بالا دشت، خُد منطقهسی و دایکندی بیلن ارزگان و دایکندی بیلن هلمند آرهسیده چیگره باغران تومنیده جایلشتیرگن.
دایکندی ولایت کینگشی اعضاسی غیرت علی جواهری نینگ ایتیشیچه، نیچه وقت آلدین طالبان گروهی کجران تومنی اوستیگه اویوشتیریلگن هجومیده مغلوبیت گه اوچرهگن، بیراق ولایت کینگشی گه کیلگن معلومات اساسیده، طالبان گروهی دایکندی ولایتی نینگ کجران، کیتی و ناوه میش تومنلرینی سقوط بیریش گه قصد قیلگن.
جناب جواهری گه کوره، حکومت نینگ دقتسیزلیگی باعث، کجران، کیتی و ناوه میش تومنلری سقوط قیلگنده، انسانی فاجعه یوز بیریشی ممکن.
بیراق، دایکندی پولیس قومندانی محمدآغا داوودنینگ سلاموطندارگه ایتیشیچه، کجران تومنی نینگ برچه بولیملریده خوفسیزلیک کوچلری طالبان گروهی نینگ هجوملرینی آرقه گه اوروش اوچون تیارگرلیک آلگن.
طالبان گروهی بیر آی آلدین، کجران تومنی نی سقوط بیریش اوچون هجوملرینی شدتلنتیرگن و آتیشمهلر نتیجهسیده ایکی تامان هم قربانلیک بیرگن، بیراق طالبان گروهی مذکور تومن نی سقوط بیره آلمهدی.
