بامیان ولایتیده یشش محیط‌نی سقلش فعال‌لریدن بیرقطاری، مذکور ولایت‌نینگ خوفسیزلیک ملازم‌لری آرقه‌لی وحشی حیوانلر اینیقسه «کییک» آوله‌نیشیدن خواطر بیلدیریب ایتیشیچه، بامیان خوفسیزلیک قومندانی جنرال عبدالمبین ایزدیارگه تیگیشلی کیشی‌لر، اوتگن نیچه کونده ناقانونی شکلده حیوانلرنی آو قیلیش‌نی باشله‌گن‌لر.
بامیان یشاوچیلریدن بیری ابراهیم حفیظیان‌نینگ سلام‌وطندارگه ایتیشیچه، اوتگن کون ولایت خوفسیزلیک قومندانی گه تیگیشلی رحمت‌الله آتلی کیشی، کهمرد تومنی‌نینگ شکاری دره سیده بیر کییک نی آولب و ییتی‌نی مذکور ولایت خوفسیزلیک قومندانی گه یوبارگن.
حفیظیان گه کوره، او بو واقعه گه گواه بولگن و بو موضوع نی اجتماعی ترماقلرده پایلشگنی‌دن سونگ، رحمت‌الله تامانیدن تهدید ایتیلگن.
عین حالده، بامیان ولایتی‌نینگ خوفسیزلیک قومندانی جنرال عبدالمبین ایزدیار، سلام‌وطندارگه بیرگن صحبتی‌ده بو موضوع دن خبرسیزلیک بیلدیرگن.
ایزدیارنینگ ایتیشیچه، بو گپ‌لر تبلیغ دیر و پولیس بونده‌ی بیر ایش‌گه قول اورمه‌گن. اونگه کوره، بو توغریده تدقیقات بوله‌دی و بونده‌ی ایش بولگن صورتده، عامل‌لری جزالنیشی ممکن.
اوشبو قضیه توغریسیده بامیان ولایتی‌نینگ یشش محیط‌نی سقلش اداره‌سی‌نینگ فیسبوک صحیفه‌سیده یازیلیشیچه،: «یشش محیط‌نی سقلش اداره‌سی‌نینگ کونگیل‌لی ایشلاوچیلری‌نینگ معلوماتی و گواه‌لیگی اساسیده، وحشی حیوانلر کوپلب ولایت پولیسی تامانیدن آولنه‌دی و بو مسئله تیکشیریلمه‌گن صورتده، مذکور ولایتده وحشی حیوانلر اینیقسه کییک نسلی نابود ایتیلیشی ممکن.»
ایسلنگن موضوع توغریسیده، بامیان ولایتی‌نینگ یشش محیط‌نی سقلش اداره فکری‌نینگ اورگه‌نیش اوچون علاقه قوردیک؛ بیراق کیین مه کیین قونغیراق نتیجه‌سیده مؤفق بولمه‌دیک.
قویاش 1389- ییل، 19- جوزا ده جمهورلیک ریاستی تامانیدن صادر ایتیلگن 1700 رقم‌لی حکم اساسیده، وحشی حیوانلر آولش منع ایتیلگن و کییک ایسه سقلش‌ده بولگن حیوانلردن بیری دیر. جمهور رئیس‌نینگ حکمی اساسیده، امنیتی کوچلر بو حکم‌نی عمل‌گه آشیریش خصوصیده، مسؤول بولگن.
