خوست ولایتی‌نینگ معارف اداره‌سی مسؤول‌لری، مذکور ولایت‌نینگ کیچکی مکتب‌لریده خاتین قیزلر حضوری سیزیلرلی درجه‌ده آشگن‌لیگی باره‌سی‌ده خبر بیرماقده‌لر. رسمی‌لر، جاری ییل‌ده عیال‌لر کیچکی لیسه‌سی کوزگه کورینرلی مقیاسده آلشگنی‌نی ایته‌دیلر.
خوست ولایتی‌نینگ معارف اداره‌سی باشلیغی بختور بختیاری سلام‌وطندار بیلن اوتکزگن صحبت‌ده، اوشبو ولایت‌ده موجود فرهنگی و اجتماعی قیین‌چیلیک‌لرگه قره‌می، خاتین قیزلرنی بیلیم اورگه‌نیش‌گه نسبتن قیزیقیش‌لری آشگن دیگن.
حسابات‌لرده قید ایتیلیشیچه، خوست ولایتی‌نینگ کیچکی مکتب‌لریده چمه‌سی اوتیز یاش‌ده بولگن 1600خاتین قیز اوقووچی درس بیلن شغللنه‌دی. بولرنینگ 60ته‌سی خاتین اوقووچی‌لردن عبارت.
سپوژمی هر کون کیچ ساعت تورت‌ده صنفداش‌لری بیلن مکتب باره‌دی. اون ایکینچی صنف اوقووچی‌سی بولگن سپوژمی مکتب‌دن علاوه ولایت‌ده‌گی خصوصی موسسه‌لردن بیریده ایش قیله‌دی. او، کونده‌لیک ایشلرینی بجریش اوچون او ایشکدن بو ایشیککه باریب، کون اداغی‌ده مکتب باره‌دی. مذکور خاتین‌نینگ حکایه قیلیشیچه، اقتصادی معما موجودلیگی سبب ییل‌لب ایش قیلیش‌گه مجبور بولگن و انه شو سبب تعلیم آلیش‌دن اوزاق قالگن. سپوژمی، کیچکی مکتب حیاتی اوچون طلایی فرصت یره‌تگن‌لیگینی بیلدیره‌دی.
کیچکی مکتب‌لرنینگ اوقووچی‌لری ولایت معارف اداره‌سی‌نینگ مسؤول‌لریدن تعلیم و تربیه ساحه‌ده دییرلی اعتبار قره‌تیشلرینی سوره‌دیلر. ولایت معارف اداره‌سی رسمیلرینی تعلیم و تربیه اینیقسه کیچکی مکتب‌لر تیزیمی اوچون بی فرق یانده‌شه یاتگن‌لیککه عیبلگن اوقووچی‌لریدن بیری وزیره سعادت‌نینگ حکایه قیلیشیچه، مکتب‌ده بولگن قیین‌چلیک‌لرنی نیچه مرته ولایت معارف اداره‌سی بیلن اورته‌گه قویگن‌لر؛ لیکن، رسمی‌لر بو توغریده هیچ گاه ایجابی جواب بیرمه‌گنلر.
کیچکی لیسه مدیری نجیب‌الله احمدزی، اوقووچی‌لرگه موجود مشکل‌لری بر طرف ایتیلیشی اوچون بار کوچی‌دن فایده‌له‌نیشی اوچون سوز بیرگن. شونینگ‌دیک خوست ولایت نینگ معارف اداره‌سی باشلیغی بختور بختیاری، تخنیکی قیین‌چلیک یالغوز کیچکی لیسه‌ده چیکله‌نیب قالمی، بل‌که ولایت‌نینگ برچه لیسه‌لریده بو مشکل موجودلیگی حقیده تاکیدله‌گن.
شوکبی خوست ولایت والیسی حکیم‌خان حبیبی، حاضرگی کونلرده هم اوقووچی‌لرنینگ کته قسمی آچیق فضاده درخت‌لر آستی‌ده درس اوقیش بیلن شغللنه‌نیشلرینی بیلدیرگن. او، دولت تیزلیک‌ده بوتون قیین‌چلیک‌لرنی برطرف قیلیش اوچون اونچه‌لیک امکانیت‌گه ایگه ایمس‌لیگی توغریده علیحده تاکیدله‌گن.
خوست ولایت‌نینگ معارف اداره‌سی حساباتی‌ده یازیلیشیچه، حاضرگی کونده ولایت بویلب 330 مینگ اوقووچی درس اوقیش بیلن شغلله‌نیب کیلماقده و اولرنینگ 100 مینگی ایسه قیزلردن عبارت.
