خوست ولایتینینگ ایریم منطقهلریده یوزبیرگن سوو تاشقینلری نتیجهسیده، 17 کیشی هلاک بولگن.
خوست حاکمی سوزلاوچیسی محمدمبارز زدراننینگ سلاموطندارگه ایتیشیچه، اوتگن کون کیچ قورون (سهشنبه) مذکور ولایتنینگ صبری تومنیده یوزبیرگن سوو تاشقینلریده بیر عایلهنینگ 7 اعضاسی هلاک بولگن. مذکور عایلهنینگ اعضاسی دوالش اوچون پاکستان کیتگن ایکن و قیشلاقلریگه قیتیش جریانیده سوو تاشقینیگه روپهره بولگنلر.
اونگه کوره، سوو تاشقینلری باشقه منطقهلرگه هم جانی و مالی زیان ییتکیزگن.
بیراق عینی گواهلر، سوو تاشقینلر قربانلیک رقمینی بوندن آرتیق دییدی. اولرنینگ ایتیشلریچه، اوشبو سوو تاشقینلرده 17 کیشی هلاک بولگن کیم، 8 باله، 6 عیال و 3 ایرکک شامل بولهدی.
عینی گواهلر، علیشیر تومنیده هم سوو تاشقینی یوزبیرگنیدن خبر بیرهدی.
شونینگدیک، خوست ملکی کسلخانهسیده بیر منبع آتی فاش ایتیلیشینی ایستمهی سلاموطندارگه ایتیشیچه، اوشبو کسلخانهگه 17 جسد آلیب کیلینگن و اولر عیاللر، بالهلر و ایرککلردن عبارت بولگن.
