د سولې لپاره د امریکا د بهرنیو چارو وزارت ځانګړی استازی زلمی خلیلزاد وايي، په افغانستان کې د تېرو ۲۴ ساعتونو پر مهال شوی تاوتریخوالی ډېر ناوړه و او له کبله یې ډېرو کسانو خپل ژوند له لاسه ورکړی دی.
نوموړي نن سهار د یوه ټویټ له لارې په هرات کې د امنیتي ځواکونو د برید په غبرګون کې ویلي، په یاد ولایت کې د پېښې د عیني شاهدانو تصویرونه او راپورونه ښيي چې په یاد برید کې د ماشومانو په ګډون ډېری ملکیانو ته مرګژوبله اوښتې ده.
نوموړي د دغه برید د غندنې ترڅنګ ویلي چې د پېښې د څېړلو ملاتړ کوي.
خلیلزاد زیاته کړې، خلک ژرترژره د سولې خبرواترو پیل غواړي؛ ځکه په وینا یې، «ډېر قبرونه د سولې پروسې د پرمختګ لامل نه کېږي.»
هغه د طالبانو د وروستیو بریدونو په اړه هم اندېښنه ښودلې چې له کبله یې یوشمېر ملکیانو ته مرګژوبله اوښتې ده.
پرون په هرات کې یوه امنیتي چارواکي سلاموطندار ته ویلي و چې د دغه ولایت په ګذره ولسوالي کې د امنیتي ځواکونو په دوو بریدونو کې د طالبانو د شپږو مهمو غړیو په ګډون له ۴۰ ډېرو کسانو ته مرګژوبله اوښتې ده.
د سیمې اوسېدونکي ادعا کوي چې د واده پر مراسمو هوايي برید کې یوشمېر ملکیانو ته مرګژوبله اوښتې ده.
دوی وايي، لومړنی برید پر یوه موټر چې د قاري نبي د کورنۍ غړي پهکې وو، شوی او بل هم د واده پر مراسمو چې د پېښې ځای ته نږدې وو، شوی دی.
خو د هرات د والي ویاند جیلاني فرهاد وايي، یاد برید پر هغه ځای شوی چې د طالبانو یوشمېر مهمو کسانو ـ مولوي حیدر، عبدالله اکبري، ملا رحمتالله، ذبېحالله اکبري، ملا محمد او ملا عبدالحق چې پر اسامه مشهور دی، غونډه جوړه کړې وه.
د نوموړي په وینا، د طالبانو محلي قوماندانان چې پر دولتي تاسیساتو د برید پلان یې جوړاوه، وژل شوي دي.
د هرات د پولیسو ویاند هم ویلي چې له یادې پېښه سره هممهاله د ملکیانو یو موټر د سړک غاړې پر ماین ختلی او چاودنه یې کړې چې له کبله یې یوشمېر ملکیان وژل شوي دي.
د ملي دفاع وزارت وايي، د هرات د ګذرې ولسوالي په «خم زیارت» سیمه کې د امنیتي ځواکونو له لوري ملکیانو ته د مرګژوبلې اوښتو پېښه به په جدي توګه وڅېړي او پایله به یې هم له خلکو او رسنیو سره شریکه کړي.
