د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد هند ته د خپل سفر په اړه ویلي چې دغه هېواد باید د ترهګرۍ په اړه خپلې اندېښنې له طالبانو سره مخامخ شریکې کړي.
نوموړي «د هندو» له رسنۍ سره په مرکه کې ویلي، له هندي چارواکو سره یې د افغان سولې په پروسه کې د رول لوبولو څرنګوالي په اړه هم خبرې کړې دي.
د هغه په وینا، که څه هم هند د افغانستان په پرمختګ کې ښه رول لوبولی، خو د سولې په نړیوالو هڅو کې یې رول نه دی لوبولی.
زلمي خلیلزاد دغه راز ویلي چې «هند په افغانستان کې یو مهم ځواک دی او که «هندـطالبان» سره دخیل شي، دی به یې هرکلی وکړي.»
نوموړي زیاته کړې: «زه باور لرم چې د هند او طالبانو خبرې اترې مهمې دي او د ترهګرۍ په اړه د هند اندېښنې هم مهمې دي چې باید مخامخ یادې شي.»
هغه د سفر په وروستۍ دوره کې قطر ته له تګ او له ملابرادر سره تر لیدنې وروسته هند او بیا پاکستان ته ولاړ.
خلیلزاد پرون په پاکستان کې د دغه هېواد د پوڅ له مشر قمر باجوه سره ولیدل. هغه په دې لیدنه کې د سیمې پر امنیت او افغان سولې پروسې خبرې کړې دي.
