افغانستان تینچلیگی بوییچه آمریکا خاص نماینده‌سی زلمی خلیلزاد، رمضان بیره‌م کون‌لریده افغانستان حکومتی و طالبان گروهی تامانیدن آتیش کیسین اعلام ایتیلگنی نی خوش قرشی‌له‌دی.
بوگون (یکشنبه 4- جوزا) جناب خلیلزاد بیر توییت یازیب، ایکی تامان آرقه‌لی آتیش کیسین اعلام ایتیلگنی نی تینچلیک پروسه‌سی تیزلیک بیلن آلغه کیتیشی اوچون یخشی بیر فرصت بیلیب اورغولشیچه، بو فرصت قولدن کیتمه‌سی کیره‌ک. اونینگ کوپه‌یتیریشیچه، آمریکا بو توغریده یاردم بیریش اوچون اوز سهمی نی بجریشی ممکن.
جناب خلیلزاد افغانستان حکومتی و طالبان گروهیدن، تینچلیک کیلیشوونامه‌سی اساسیده قالگن محبوس‌لرنی قوییب یورباریب و زوروانلیک میزانی نی کمه‌یتیریب و شونینگدیک افغانستان‌لیکلرارا سوزلشوولر باشله‌نیشی اوچون ینگی بیر تاریخ تعیین قیلیشی‌لرینی سوره‌دی.
خلیلزاد گه کوره، ایکی تامان رهبرلری یخشی قرار آلیب و اهالی نینگ فایده‌سینی اولویت گه قرار بیریش‌لری کیره‌ک.
عین حالده ناتو افغانستان ده اوچ کون‌لیک آتیش کیسین اعلام ایتیلگنی نی خوش قرشی‌لب ایتیشیچه، بو تشکیلات افغانستان ده دواملی تینچلیک تأمین ایتیلیشی گه متعهد دیر.
ناتو باش کاتبی ینس استولتنبرگ برچه تامان‌لردن بو فرصت‌دن یخشی فایده‌لنیش‌لرینی سوره‌یدی.
شونینگدیک افغانستان بوییچه ناتو تشکیلاتی ایکی تامان آرقه‌لی آتیش کیسین اعلام ایتیلگنی نی خوش قرشی‌له‌دی.
باشقه بیر تاماندن کابل ده کانادا ایلچیسی دیوید متکالف، رمضان بیره‌م مناسبتی بیلن بیر قوتلاو پیام ترقه‌تیب، بیره‌م کون‌لری افغانستان‌لیکلرگه تینچلیک و برقرارلیک اوچون یخشی بیر فرصت بولیشی و شونینگدیک برچه کیشیلر اوروش تامان‌لری آرقه‌لی زوروانلیک کمه‌یتیریلیشی گه شاهد بولیش‌لری توغریسیده امید بیلدیرگن.
او، افغانستان سیاسی رهبرلریدن تینچلیک و برقرارلیک شامل افغانستان اهالیسی نینگ اوزون پیت‌لی فایده‌لری خصوصیده بیرگه‌لیکده فعالیت قیلیش‌لرینی سوره‌گن.
کانادا ایلچیسی نینگ کوپه‌یتیریشیچه، مملکتی کرونا ویروسی گه قرشی و شونینگدیک تینچلیک خصوصیده افغانستان حکومتی و اهالیسی نینگ سعی و حرکت‌لریدن حمایت قیله‌دی.
ایتیش کیره‌ک کیم، اوتگن کیچه طالبان گروهی بیر اعلامیه آرقه‌لی رمضان بیره‌م کون‌لریده اوچ کون‌لیک آتیش کیسین اعلام قیلدی.
مذکور گروه نینگ ایتیشیچه، بیره‌م کون‌لریده امنیتی کوچلرگه قرشی هجوم قیلیشمه‌یدی و جنگری‌لریدن بو اوچ کونده امنیتی کوچلر نظارتی گه بولگن منطقه‌لرده بارمه‌سلیک‌لرینی سوره‌گن و شونینگدیک دولتی کوچلرگه هم طالبان نظارتی گه بولگن منطقه‌لرده باریش گه رخصت بیریلمه‌گن.
طالبان گروهی تامانیدن اعلامیه نشر قیلینگنیدن بیر نیچه دقیقه کیین، جمهوررئیس غنی اوشبو اوچ کون‌لیک آتیش کیسین نی خوش قرشی‌له‌دی. جمهوررئیس غنی بیر توییت آرقه‌لی امنیتی کوچلرگه بو اوچ کونده آتیش کیسین قیلیب و تهاجمی عملیات‌لری نینگ توخته‌تیش‌لرینی سوره‌دی.
شونینگدیک، ملی مصالحه عالی کینگش باشلیغی عبدالله عبدالله آتیش کیسین اعلام ایتیلگنی نی خوش قرشی‌له‌دی.
