افغانستان تینچلیگی بوییچه آمریکا خاص نمایندهسی زلمی خلیلزاد نینگ ایتیشیچه، افغانستان تینچاهالیسی حاضرگه قدر یول چیککهسیده ییرلشتیریلگن ماین پارتلشی، ریجهلنگن ترورلر و شونینگدیک اوروش نی باشقه نتیجهلریدن عذاب کورماقده.
جناب خلیلزاد اوتگن کیچه بیر توییت آرقهلی، اوتگن هفته تینچاهالی تلفاتی توغریسیده یوناما تامانیدن نشر قیلینگن گزارش گه اشاره قیلیب ایتیشیچه، تینچاهالی سقلهنیشی اوچون اوروش نینگ برچه تامانلری زوروانلیکلرنی کمهیتیریش اوچون تیزلیککه اقدام قیلیشلری کیرهک.
اونینگ کوپهیتیریشیچه، بو گزارش گه کوره تینچاهالی تلفات میزانی کمهیگن، بیراق طالبلرنینگ سونگی هجوملری و تینچاهالی تلفاتی بو یوتوقلرنی خوف بیلن روپهرو قیلگن.
اونگه کوره، شونینگدیک طالبلرنینگ سونگی هجوملری افغانستان امنیتی کوچلری نینگ عکسالعملی گه روپهرو بولگن کیم «اونینگ نتیجهسی قیین و سلبی بیر چرخه دیر کیم او چپه بولیشی کیرهک.»
افغانستان بوییچه بیرلشگن ملتلر تشکیلاتی نینگ اورین باسرلیک هیأتی یا-ده یوناما اوتگن هفته اعلام قیلیشیچه، افغانستان ده اوروش باعث میلادی 2020- ییل نینگ بیرینچی اوچ آییده 533 تینچاهالی جان بیرگن.
مذکور گزارش اساسیده، دولت گه قرشی گروهلر 55 فایز تینچاهالی تلفاتی نینگ عاملی دیر کیم اوندن 29 فایزی طالبان گروهی گه نسبت بیریلگن.
افغانستان تینچلیگی بوییچه آمریکا خاص نمایندهسی مذکور توییت دوامی ده ایتیشیچه، محبوسلر قوییب یوباریلیشی و زوروانلیکلر کمهیتیریلیشی اوچون طالبان و دولت سعی و حرکتلرینی تیزلشتیریشلری کیرهک.
خلیلزاد نینگ کوپهیتیریشیچه، بو توغریده هر قندهی توجهسیزلیک تینچاهالی تلفاتی میزانی نینگ کوپهیش معناسیگه کیلهدی و برچه افغانلر کرونا ویروسی گه قرشی بیرلشیکلری کیرهک.
