د کابل د شپږمې، دیارلسمې او اتلسمې ناحیو اوسېدونکیو د حکومت نه پام او د کابل ښاروالي د بېغورۍ پر وړاندې اعتراض وکړ.
معترضان وايي، په یادو سیمو کې د سېلاب راوتو لپاره څو کانالونه دي چې د خلکو د تګ راتګ لپاره پل نهلري.
هغوی زیاتوي، کله یې چې دا ستونزه له حکومت سره شریکه کړه، حکومت په یادو سیمو کې د پلونو جوړولو لپاره یوازې ۲۰ ډالره ځانګړي کړل.
د سیمو اوسېدونکیو په طنزي توګه د حکومت له دې اقدام نه مننه وکړه.
مدني فعال او د دې سیمې اوسېدونکی شریف وطندوست وايي، د واورې او باران پر مهال یاد کانالونه له اوبو ډکېږي او خلک یې له ګڼو ستونزو سره مخ کړي دي.
د نوموړي په وینا، که څه هم د دغو سیمو اوسېدونکي تل د حکومت ترڅنګ ولاړ دي او ملاتړ یې کړی، خو کله چې له ستونزو سره مخ شي، حکومت یې له پامه غورځوي.
په همدې حال کې د سیمې یو ملا امام غلام رسول حسیني هم وايي چې د اوبو راوتلو او د کانالونو ډکېدو پر مهال اړ دي چې په کور کې پاتې شي.
د سیمې اوسېدونکي وايي، سره له دې چې په پلازمېنه کې اوسېږي، خو د حکومت د بېغورۍ له کبله هېڅ ډول ښاري خدمتونو ته لاسرسی نهلري.
