سونگی کونلر کابل‌ده یوز بیرگن قانلی هجوملردن سونگ، امریکا جمهور رییسی طالب‌لر بیلن هیچ قنده‌ی مذاکره اوتکزیلمه‌سینی بیلدیردی و عین حالده، افغانستان حکومتی‌نینگ ایتیشیچه، بوندن کیین تینچلیک اوروش میدانیده ایزلَنه‌دی.
سلام‌وطندارگه صحبت بیرگن جمهورلیک ریاستی مطبوعات دفتری سرپرستی شاه‌حسین مرتضوی‌نینگ ایتیشیچه، بوندن آلدین جمهور رییس غنی طالب‌لرگه افغانستان حکومتی بیلن مذاکره اوتکزیش‌گه قیسقه زمانلری بارلیگی‌نی ایتگن ایدی.
جناب مرتضوی گه کوره، طالب‌لر افغانستان حکومتی بیلن بولگن سوزلشوو فرصت‌لریدن فایده‌لنمه‌ی و دولت‌گه قرشی اوروش‌نی شدت لنتیرگن‌لر.
جمهورلیک ریاستی مطبوعات دفتری سرپرستی‌نینگ ایتیشیچه، ترورچی گروه‌لرگه قرشی عملی آدیم‌لر کوتریلیش زمانی کیلگن و بوندن سونگ، تینچلیک اوروش میدانلریده ایزلنه‌دی.
شونینگ‌دیک، اوتگن کیچه امریکا جمهور رییسی دونالد ترامپ‌نینگ ایتیشیچه، طالب‌لر چپ و راست گناه‌سیز اهالینی اولدیره‌دی و شو یوزه دن اولر بیلن مذاکره قیلمه‌یدی.
بیراق، تینچلیک عالی کینگشی اعضاسی عطاالله لودین‌نینگ ایتیشیچه، بوندن آلدین دولت‌گه قرشی قوراللی عصیانچیلر امریکا بیلن مذاکره اوتکزیش‌گه تیارگرلیک کورستگن؛ بیراق امریکا جمهور رییسی اولرنینگ ایستک‌لرینی رد قیلگن.
ترامپ گه کوره، طالب‌لر بیلن مذاکره اوتکزیش زمان کیلیشی ممکن؛ بیراق حاضر وقت دیر.
بوندن آلدین، تینچلیک عالی کینگشی مملکت‌ده اوروش‌گه نقطه قوییلیشی اوچون نیچه مرته طالب‌لردن افغانستان حکومتی بیلن مذاکره گه حاضر بولیش‌لرینی سوره‌گن؛ بیراق حاضرگچه طالب‌لر بو ایستک‌لرگه ایجابی جواب بیرمه‌گن و عکسینچه هجوملرینی کوپه‌یتیرگن.
امریکا جمهور رییسی دونالد ترامپ‌نینگ بیانات‌لریگه عکس‌العمل بیلدیرگن طالبان گروهی سوزلاوچی‌لریدن بیری ذبیح‌الله مجاهد، افغانستان دولتی و امریکا کوچلریگه قرشی اوروش دوامی اوستیگه تأکیدلب ایتیشیچه، افغانستان‌نی امریکالیک‌لرنینگ گورستانی‌گه اوزگرتیره‌دیلر.
