په ولسي جرګه کې د ننګرهار د خلکو استازی نوراغا ملکزی وایي چې حکومت په خپل کړو ژمنو کې پاتې راغلی.
نوموړي دا څرګندونې یک شنبه د یوې خبري غونډې پر مهال رسنیو ته وکړې او پر حکومت یې نیوکه وکړه چې تر اوسه یې د کوز کونړ په ولسوالۍ کې د جنازې پر مهال د شوي برید عاملان نه دي نیولي.
ملکزي ګواښ وکړ که چېرې حکومت د پېښې عاملان ونه نیسي دوی به د حکومت ضد اعتراضونه پیل کړي.
نوموړي په خپلو خبرو کې د یو شمېر کسانو نومونه هم واخیستل او ویې ویل چې په ملي شورا کې یې پرې عرېضه کړې خو حکومت یې پر وړاندې غلی دی. « په ملي شورا کې مې په والي، حضرت علي، رحمت الله، جنرال مومن او د ښېوې په ولسوال، قومندان او نور کسانو باندې عرېضه کړې، دوی ماته مسوول دي.»
هڅه مو وکړه په راپور کې د ولسي جرګې د غړي ملکزي په خبرو کې د یادو کسانو غبرګونونه ولرو خو د ځینو په نظر اخیستو بریالي نهشو.
په همدې حال کې د حضرت علي زوی او د ننګرهار د ولایتي شورا ريیس احمد علي حضرت د ده په پلار د ملکزي نیوکې پر ځای نه بولي او دا کار د دولت د وسلهوالو مخالفانو بولي. « دا کار د تروریستانو دی، دا کار د وکیلانو نه دی. موږ د پاکستان ای ایس ای خلک نه یو؛ خلک غواړي موږ په دې نوم بدنام کړي.»
په ورته مهال د ننګرهار د والي ویاند عطاالله خوږیاڼی وایي چې د کوزکونړ په ولسوالۍ کې د شوې پېښې په اړه هم په ولایتي او هم په مرکزي کچه څېړنې پیل شوي چې پایلې به یې له ولسونو سره شریکې شي.
تېره روژه د ننګرهار ښېوې ولسوالۍ کې د محلي پولیس د یوه مړ شوي قومندان شېخ اکرم جنازې مراسمو کې ځانمرګی برید شوی و، چې د ولایتي شورا د غړي عبدالله لالاخان ملکزي په ګډون پهکې له ۳۰ډېر کسان ووژل شول او شاوخوا ۱۳۳ نور ټپیان شول.
