د جوزجان د مرکز شبرغان ښار د لاسي توکیو سلګونه پلورونکي او کراچۍ لرونکي چې د دغه ولایت د والي دفتر مخې ته د اعتراض په توګه راټول شوي وو وايي، که سیمهییز چارواکي یې غوښتنې و نه مني، ځانونه به په دار را وځړوي.
د معترضانو په وینا، درې میاشتې کېږي چې د جوزجان ښاروالي دوی د ښار په منځ او پر واټونو نه پرېږدي او داسې ځای ته یې لېږدولي چې د توکیو پېرلو لپاره څوک نه ورځي.
د لاسي توکیو پلورونکي صالحمحمد او فضلمحمد وايي، کاروبار نهشته او اړ دي چې په بازار کې د یوې مړۍ ډوډۍ موندلو لپاره لاسي توکي وپلوري، خو په وینا یې ښاروالي له مارکېټونو خپل باج اخلي او موږ د سړک پر سر کاروبار ته نه پرېږدي.
دوی وايي، تر اوسه یې غږ چا نهدی اورېدلی او که بیا یې هم غوښتنو ته پام و نهشي، ځانونه به په دار راوځړوي.
خو د جوزجان د والي ویاند فریدون انیق وايي، د شبرغان ښار د لاسي توکیو پلورونکي او کراچۍوالا د ښاري چارو د تنظیم کمېسیون د پرېکړې له مخې، ټاکل شوې یوه ځانګړي ځای ته ولېږدول شی.
د جوزجان یو شمېر اوسېدونکي سره له دې چې په ښار کې د نظم له راتلو خوښي څرګندوي، خو وايي، سیمهییز چارواکي دې د لاسي توکیو پلورونکي او کراچۍ لرونکي یوه داسې مناسب ځای ته ولېږدوي چې توکي يې په ښه توګه وپلورل شي.