جوزجان محلی و امنیتی رسمیلری نینگ ایتیشیچه، حاضر مذکور ولایت نینگ بیش تومنیده امنیتی کوچلر و طالبان گروهی آرهسیده آتیشمه دوام ایتماقده.
جوزجان رسمیلری گه کوره، درزاب، قرقین، آقچه، مردیان و فیضآباد تومنلریده امنیتی کوچلر و طالبان جنگریلری آرهسیده آتیشمه دوام ایتماقده. جوزجان حاکمی نینگ ایتیشیچه، لیکن درزاب تومنیده آتیشمه جدی بولگن.
جوزجان حاکمی لطفالله عزیزی نینگ آگاهلنتیریشیچه، درزاب گه یاردمچی کوچ یوباریلمهگن صورتده، مذکور تومن طالبان نینگ قولی گه سقوط قیلیشی ممکن.
عین حالده، درزاب یشاوچیلریدن اونلرچهسی ناراضیلیک بیلدیرگن. اولرنینگ ادعا قیلیشیچه، «بو تومنده طالبان جنگریلری اولتیریش اویلر و بالهلرنی اوتگه یاندیرگن.»
درزاب یشاوچیلری گه کوره، حاضرگهقدر اوشبو آتیشمهلر جریانیده 10 دن آرتیق امنیتی عسکر هلاک و باشقه 10 عسکر یرهلنگن.
جوزجان پولیس قومندانی عبدالواحد وجدان، درزاب آتیشمهسینی تصدیقلهیدی. اونینگ ایتیشیچه، طالبان گروهی نینگ هجوملرینی آرقه گه اوروش اوچون مرکزدن درزاب و باشقه تومنلرگه یاردمچی کوچ یوباریلهدی.
بیراق، جناب وجدان، مذکور تومنده اولتیریش اویلر و بالهلر اوت بیریلگنی و شونینگدیک، امنیتی کوچلر هلاک ایتیلگنی توغریسیده معلومات بیرمهگن.
طالبان گروهی حاضرگچه بو توغریده هیچ نرسه دیمهگن.
جوزجان پولیس قومندانی نینگ کوپهیتیریشیچه، درزاب و قرقین تومنلریده امنیتی کوچلر و طالبان گروهی آرهسیده آتیشمه یوز بیرگنی باعث، آواز بیریش مرکزلر یاپیق قالگن.
بیراق اونینگ ایتیشیچه، آقچه، مردیان و فیضآباد تومنلریده امنیتی کوچلر و طالبان گروهی آرهسیده آتیشمه بولگنده هم آواز بیریش مرکزلر آچیق بولگن.
شو توغریده…
جوزجانده طالبان نینگ تاولمهچیلیک جایی یوق ایتیلدی
