جوزجان ولایتی‌نینگ محلی رسمی‌لری، مذکور ولایت‌نینگ خم‌آب تومنیدن 400 دن آرتیق عایله زوردن کوچیریلگنیدن خبر بیره‌دیلر.
اوشبو عایله‌لرنینگ سلام‌وطندارگه ایتیشیچه، قوراللی طالب‌لر خم‌آب تومنی‌نینگ ایریم قسمت‌لرینی نظارت گه آلگنیدن سونگ، اویلری و دکانلرینی اوتگه یاندیرگن. اولر حاضر شبرغانده حیات کیچیره‌دیلر. ایتیش‌لریچه، حکومت حاضرگه‌قدر بدرغه بولگن عایله‌لرگه هیچ دقت قیلمه‌گن.
بدرغه‌لردن بیری کلثوم نینگ ایتیشیچه، یالغیز جانی‌نی قوتقرگن، برچه بار و یوغی اوییده قالگن و حاضر هیچ نرسه‌سی یوق دیر. اوشبو عایله‌لرنینگ ایتیشیچه، قوراللی طالب‌لر اویلرینی اوتگه یاندیرگن و شونینگدیک، ایریم اویلرده ماین ییرلشتیرگن.
اوشبو واقعه‌نی تصدیق‌لگن خم‌آب تومنی ولسوالی انجنیراحمد نینگ سلام‌وطندارگه ایتیشیچه، بدرغه بولگن عایله‌لر شبرغان، میمنه و مزارشریف شهرلریگه کیتگن‌لر. اونگه کوره، بدرغه بولگن عایله‌لرنینگ وضعیتی خواطرلی دیر.
جوزجان ولایتیده مهاجرلر و بدرغه‌لر ریاستی‌نی سرپرستی سیدطالب سادات نینگ ایتیشیچه، بدرغه بولگن عایله‌لردن یالغیز 40 عایله بو اداره گه مراجعت قیلگن و اولرنینگ تیکشیریش جریانی ایرته باشلنه‌دی.
بیراق، جوزجان پولیس قومندانلیگی خوفسیزلیک آمری کمال‌الدین یاورنینگ ایشانچ بیریشیچه، خم‌آب تومنیده تیزلیک‌که تازه‌لش حربی عملیات یولگه قوییله‌دی.
قوراللی طالب‌لر حاضرگچه بو توغریده میدیاگه هیچ نرسه دیمه‌گن.
