کودکی با اسم مستعار رحمت‌الله در یک گفت‌وگوی اختصاصی به سلام‌وطندار می‌گوید که جنگ‌جویان خارجی، پسران زیر سن را به قلم‌رو گروه طالبان فرا می‌خوانند و به آنان آموزش‌های نظامی، ماینگذاری و انتحاری می‌دهند.
رحمت‌الله شانزده ساله که به تازه‌گی از صفوف گروه طالبان بریده و در منطقه زیر حاکمیت دولت زنده‌گی می‌کند، می‌گوید که کودکان آموزش‌دیده بیش‌تر در حملات چریکی و ماینگذاری سهم می‌گیرند.
به گفته او، هر فرمانده طالبان از ده تا بیست کودک را با خودشان ترتیب می‌کنند و از آنان برای ماینگذاری و حملات چریکی کار می‌گیرند.
مقام‌های امنیتی در ولایت شمالی جوزجان به سلام‌وطندار تأیید می‌کنند که جنگ این ولایت را جنگ‌جویان خارجی که اتباع کشورهای اوزبیکستان، پاکستان و ترکمنستان اند، رهبری می‌کنند و اکثریت جنگ‌جویان‌شان کودکان زیر هژده سال هستند.
عبدالواحد وجدان، فرمانده پولیس جوزجان به سلام‌وطندار می‌گوید که در حال حاضر، جنگ‌جویان ترکمستانی، پاکستانی، اوزبیکستانی و چچینی در شماری از ولسوالی‌های این ولایت فعالیت دارند و از کودکان زیر 18 سال در ماینگذاری و جنگ‌های چریکی استفاده می‌کنند.
شماری از عالمان دینی جوزجان، استفاده از کودکان زیر سن را در عملیات‌های نظامی و ماینگذاری از سوی گروه‌های فعال جنگ‌جو در کشور، ناروا و خلاف ارزش‌های انسانی و اسلامی می‌دانند.
مفتی محمد رسول مجهز، رئیس شورای علمای جوزجان می‌گوید، استفاده از کودکان در میدان‌های جنگ و حملات انفجاری و انتحاری جواز ندارد و چنین کاری، خلاف ارزش‌های انسانی است.
اما ذبیح‌الله مجاهد، یکی از سخنگویان گروه طالبان، حضور جنگ‌جویان خارجی در صفوف این گروه را رد می‌کند.
