فاریاب ولایتیده افغانستان ملی اسلامی جنبش حزبی طرفدارلرینینگ آگاهلنتیریب ایتیشیچه، حکومت نظارتیدن نظامالدین قیصاری قوییب یوباریلمهگن صورتده، جمهور رییسگه مذکور ولایتکه کیلیشی اوچون رخصت بیریلمهیدی.
اخیرگی پیتلر جمهور رییسنینگ فاریاب ولایتگه سفری قیلیشی خصوصیده قطار مشمشلری اورتهگه چیقگن، بیراق مذکور ولایتیده ملی اسلامی جنبش حزبی‌نینگ طرفدارلری و مسووللری اوشبو مشمشلرگه قرشیلیک کورستگن.
فاریاب ولایتیده جنبش حزبی‌نینگ باشلیغی عطامحمد فیضینینگ ایتیشیچه، جمهور رییس قیصارینی اوزی بیلن آلیب کیلگن صورتده، فاریاب اهالیسی تامانیدن خوش قرشیلنهدی، یوقسه اهالی اونگه کیلیشی اوچون اجازه بیرمه‌یدی.
اوشبو ییغینگه اشتراک قیلگنلرنینگ ایتیشیچه، نظامالدین قیصارینینگ قوییب یوباریلیشی اوچون 20 کون ناراضلیک نمایش یولگه قویگنلر، بیراق حکومت هیچقندی دقت قیلمهگن.
نیچه پیت آلدین جمهور رییس بیرینچی اورین باسری جنرال دوستمنینگ خاص نمایندهسی نظامالدین قیصاری امنیتی کوچلر تامانیدن قولگه آلینیب و کابلگه انتقال بیریلدی.
نظامالدین قیصارینینگ قولگه آلینشی دلیلی حاضرگهقدر هم بیللی ایتیلمهگن؛ بیراق امنیتی رسمیلردن بیرقطارینینگ ایتیشیچه، زورهوانلیک، حربی کوچدن قولهنیش و باشقه قطار عیبلر باعث قومندان قیصاری قولگه آلینگن.
نظامالدین قیصارینینگ قولگه آلینگنیگه قرشی، جنرال دوستمنینگ طرفدارلری فاریاب، تخار، جوزجان، سرپل، بغلان، بدخشان، بلخ،سمنگان، قندوز، بامیان و هرات ولایتلریده ناراضلیک نمایش یولگه قویب قیصارینینگ قوییب یوباریلیشینی سورهگن، بیراق اوشبو ناراضلیکلر حاضرگهقدر نتیجه بیرمهگن.
