جمهور رییس غنی، بیر بلند مرتبه‌لی هیأت همراه لیگی‌ده بوگون (شنبه) ایرته‌لب، ترکمنستان گازی افغانستان تامانیدن پاکستان و هندگه اوتکزیلیش (تاپی) لایحه‌سی آچیلیشی اوچون، ترکمنستان پایتختی عشق آباد ده ییتیب باردی.
جمهورلیک سرایی خبرنامه‌سی اساسیده، جناب غنی، اوشبو ایکی کونلیک سفری جریانیده، تاپی لایحه‌سی آچیلیش مراسمی یانیده، «رواجلنتیریش، امنیت و تینچ‌لیک خصوصیده‌گی خلق ارا همکارلیک‌لر و طرف‌سیز موضوع‌لر» ییغینیده سوزگه چیقیشی ممکن.
تاپی لایحه‌سی افغانستان اقتصادی اوچون اونملی لایحه‌لردن بیری سنله‌دی و بو ریجه عمل‌گه آشیریلگن صورتده، افغانستان ییل‌ده میلیونلرچه دالر قولگه کیریته‌دی و شونینگ‌دیک، 12 مینگ کیشی اوچون ایش‌گه زمینه یره‌تیله‌دی. اوشبو ریجه 30 ییل جریانیده تطبیق ایتیلگنده، هر ییل 33 میلیارد متر کعب گاز پاکستان و هندگه اوتکزیله‌دی؛ بوگازدن افغانستان سهمیه‌سی کونده 14 میلیون متر مکعب گاز بوله‌دی.
عین حالده، تشقی ایشلر وزیری صلاح‌الدین ربانی‌نینگ، بوگون مجلس عمومی ییغینیده ایتیشیچه، اوشبو لایحه یالغیز اقتصادی ایمس، بلکیم کیله‌جک‌ده سیاسی فرصت‌لرهم یره‌تیشی ممکن. جناب ربانی‌گه کوره، تاپی لایحه‌سی اقتصادی منفعت یانیده، سیاسی علاقه‌لر مستحکم لنیشی و منطقه‌ده امنیت تأمین‌لنیشی خصوصیده، ایجابی تأثیر تشله‌یدی.
تاپی لایحه‌سی ترکمنستان، افغانستان، هند و پاکستان مملکت‌لری اوچون جوده اهمیت‌لی دیر و اوشبو لایحه یولگه قوییلیشی خصوصیده، منطقه مملکت‌لری اورته‌سیده حاضرگه‌قدر کوپینچه ییغین‌لر اوتکزیلگن. ایش بیلرمانلرگه کوره، اوشبو لایحه تطبیق ایتیلیشی‌گه قرشی اساسی قیین‌چیلیک، افغانستان اینیقسه ناتینچ ولایت‌لردن اوتکزیله‌دیگن لوله امنیتی‌نی تأمین‌لش دیر.
