افغانستان سوولری خلق ارا قانونلرگه ماس سقلنه‌دی. جمهور رییس سوزلاوچی‌سی‌نینگ اورین باسری سیدظفرهاشمی، افغانستان حکومتی بوندن بویان خلق ارا قانونلرگه موافق مملکت سوولرینی مدیریت قیلیش اوچون قرار آلگن دیدی.
او، حکومت بوندن سونگ بیر تامچی سوو هم تشقی مملکت‌لرگه آقیشی‌گه رخصت بیرمس‌لیگی‌نی تیل‌گه آلگن. افغانستان جمهور رییسی محمد اشرف غنی‌نینگ ایران‌گه قیلگن سفری یوتوقلری توغریسی‌ده معلومات بیریش اوچون بوگون توش‌دن کیین خبری انجمن سوزله‌گن جناب هاشمی، ایران هریردو دریاسی نینگ سووی مدیریت ایتیلیشی‌دن خواطر بیلدیرگن لیگی‌نی اظهار ایتگن.
افغانستان حکومتی اوشبو دریا باره‌سی‌ده‌گی حجت و اسنادلرنی تیکشیریب، معلومات قول‌گه کیرگن‌دن سونگ خلق ارا قانونلرگه موافق بو توغریده قرار قبول قیلیشی کوتیله دی دیگن جناب هاشمی.
شونینگ‌دیک جناب هاشمی حکومت آلتی عصردن آلدینگی حجت و اسنادلرنی جمع‌لب بو مساله توغریسی‌ده مملکت ملی مجلسی اعضالری همده اهالی بیلن مصلحت آلیب بارگن‌دن کیین سونگی قرارینی اعلان قیلهدی دیگن.
جمهور رییس سوزلاوچی‌سی‌نینگ اورین باسری، افغانستان رهبری ایران‌لیک همکسبی بیلن اوتکزگن ملاقات‌ده کوپراق ایران‌ده استقامت قیله دیگن افغانستانلیک قاچقین‌لر قیین‌چیلیگی حل ایتیلیشی اوستی‌ده تاکیدله‌گن حقیده خبر بیرگن .
ظفر هاشمی نینگ تاکیدلب ایتیشیچه، بوندن کیین افغانستان‌نینگ تشقی سیاستی تقابلی دن تعاملی گه اوزگره‌دی. پاکستان توغریسی‌ده اشاره قیلگن هاشمی رسمی کابل نینگ اسلام آباد بیلن علاقه‌سی عموم خلق‌نینگ قره‌شی و حقیقت‌لر اساسی‌ده منتظم‌لشتیریله دی دیگن. خبرچی‌لردن بیری‌نینگ سوراغی‌گه جواب بیرگن جناب هاشمی، رسمی کابل ینگی دهلی بیلن علاقه‌سینی یخشی‌لش اوچون آلیب باره‌دیگن سعی حرکت لریدن قالمس‌لیگی حقیده ینه بیر بار تاکید ایتگن.
حساباتلرگه قره‌گن‌ده مرکزی آسیاده فقط افغانستان 75 میلیارد متر معکب چوچوک سووگه ایگه. بو سوولردن فقط افغانستان 20 میلیون متر مکعبی‌دن فایده‌لنه‌دی وقالگنی ایسه قوشنی دولت‌لرگه آقه‌دی.
