رسمی انقره اوتگن هفته افغانستان کوچلی سیاسی حزبلر رهبرلریگه میزبانلیک قیلدی. افغانستان جمعیت اسلامی، وحدت مردم افغانستان و جنبش ملی اسلامی حزبلر رهبری تورکیه‌ده ییغیلدی. بو سیاسی جریانلر قیسقه مذاکره‌دن سونگ افغانستان‌نی قوتقرووچی ائتلاف تشکیل ایتدیلر.
اما، اوشبو سیاسی ائتلاف وجودگه کیلگندن نیچه کون سونگ مملکت ملی امنیت باشلیغی محمد معصوم استانکزی انقره سفر قیلدی. بو سفر ایسه ایریم شک و شبهه‌لرنی وجودگه کیلتیرگن. حکومت عبدالرشید دوستم‌گه معیین امتیازلر بیریش بیلن بو ینگی ائتلافنی بوزیش حرکت قیلگن. جمهور رییس بیرینچی اورین باسری نینگ مطبوعات بولیمی مسووللری، جناب استانکزی جنرال دوستم‌نی کابل‌گه چقیرگن دیدیلر.
اما، بیر قطار سیاسی تحلیلچیلر، مذکور حزبلر اهالی نینگ ییریک حمایت‌ده بولگنی اوچون جمهور رییسلیک سرایی خواطرگه توشگن دیدیلر. بو مساله اهالی بیلن جمهور رییسلیک سرایی اورته‌سیده فاصله کوپراق بولیشی اوچون باعث بوله‌دی دیگن تشویشلر بار.
سلام‌وطندارگه صحبت بیرگن سیاسی فعال سمیع دره‌یی، افغانستان‌نی قوتقرووچی ائتلاف جمهور رییسلیک سرایینی آغیر بیر آگاهلنتیریش دیدی. حکومت بو ائتلافنی ترقه‌تیب یوباریش اوچون بوتون بار کوچینی صرفله‌یدی دیدی دره‌یی. جناب دره‌یی، ائتلاف پایه‌لرینی مستحکم سقلب قالگن تقدیرده، حکومت تیزیمگه اصلاحات کیلتیریش‌گه مجبور بوله‌دی دیگن.
اما، باشقه بیر سیاسی تحلیلچی برنا صالحی، اوشبو ائتلاف منطقه و دنیاده‌گی قدرتلر اورته‌سیده سیاسی و نیابتی اوروشلرگه سبب بولیشی اوچون جمهور رییسلیک سرایی خواطرگه توشگن دیدی. اونینگ تعبیریچه، مذکور ائتلاف کیلگوسی سیلاولرده جمهور رییس غنی‌گه فضانی چیکله‌یدی.
صالحی، افغانستان‌نی قوتقرووچی ائتلاف ایجاد بولگن لیگی اوچون جمهور رییسلیک سرایی امریکه آرقه‌لی جدی باسیم آستیگه آلینگن دیگن. جمهور رییس غنی، دوستم‌گه امتیاز بیریش بیلن بو سیاسی جریاننی ترقه‌تیب یوباریش‌گه اولگوره‌دی دیگن بو سیاسی تحلیلچی.
جمهور رییسلیک سرایی بوندن آلدین هم بعضی بیر نماینده‌لرینی تورکیه گه جمهور رییس نینگ بیرینچی اورین باسری قاشیگه یوبارگن، اما بو نماینده‌لر یوتوق‌سیز کابل قیتگنلر.
شونینگدیک جمهور رییسلیک سرایی بو ائتلافنی ترقه‌تیب یوباریش نیت‌ده ییریک برنامه‌نی نظرده توتگن، حکومت بلند مرتبه‌لی رسمیلرینی تورکیه‌گه سفر قیلیشی بو لایحه نینگ کیچیک بیر بولیمی سنه‌له‌دی. اوتگن کون کابینه ییغینی جریانیدن ترقه تیلگن فوتو صورتلرده بو آره‌دن جناب دوستم نینگ چوکیسی کوتاریلگن لیگی کورینه‌دی.
جمهور رییس نینگ بیرینچی اورین باسری جنرال عبدالرشید دوستم، اجراییه ریاستی نینگ ایکینچی اورین باسری محمد محقق، بلخ ولایتی نینگ والیسی عطا محمد نور اوتگن هفته تورکیه نینگ پایتختی‌ده اوچره‌شیب ملاقات قیلدی. آخرگه کیلیب نیچه کونلیک ملاقاتلر نتیجه‌سی افغانستان‌نی قوتقرووچی ائتلاف اورته‌گه کیلیشی‌گه سبب بولدی.
شونینگدیک بعضی بیر میش – میشلرگه قره‌گنده، مذکور ائتلاف نینگ رهبرلری تورکیه‌دن قیتگن‌دن سونگ لوازملریدن استعفا بیره‌دی.
