مملکت باشکینتی کابلده انسان حقوقی ایرکین کمیسیونی نینگ ایکی ایشلاوچیسی اولدیریلگنیدن سونگ، جمهور رئیس غنی نینگ ایتیشیچه، مملکت ده سونگی ایکی دهه ایرکینلیگی و ارزشلرینی هدف آلیش اوچون خطرلی بیر حرکت باشلنگن و حکومت بو حرکت نینگ آلدینی آلیش گه ارادهلی دیر.
جمهورلیک ریاست سوزلاوچیسی صدیق صدیقی نینگ اوز توییتر صحیفهسیده یازیشیچه، کابینه نینگ بوگونکی ییغینیده جمهور رئیس غنی انسان حقوقی ایرکین کمیسیونی نینگ ایشلاوچیلری گه اویوشتیریلگن تروریستی و دهشتلی هجومنی قارهلگن.
جمهورلیک ریاست سوزلاوچیسی گه کوره، جمهور رئیس غنی امنیتی ادارهلرگه انسان حقوقی فعاللری، مدنی تدقیقاتچیلر و قارهلاوچیلرنینگ خوفسیزلیگینی تأمینلش گه بویروغ بیرگن.
شنبه کون انسان حقوقی ایرکین کمیسیونی نینگ اعلان قیلیشیچه، اوشبو اداره نینگ ایشلاوچیلرینی موتری کابل شهری نینگ 12- ناحیهسیگه تیگیشلی بتخاک تورت یولیده ماین گه دوچ کیلگن و نتیجهده بیر عیال شامل ایکی کیشی جان بیرگن.
اوشبو پارتلش ده انسان حقوقی ایرکین کمیسیونی نینگ ایکی ایشلاوچیسی هلاک ایتیلگنی افغانستان اهالیسی و دنیا جماعهچیلیگی نینگ عکسالعملی گه دوچ کیلدی.
بیرلشگن ملتلر تشکیلاتی نینگ اورین باسرلیک هیأتی یا-ده یوناما دفتری، بو واقعهنی قارهلش گه علاوه ایتیشیچه، انسان حقوقی مدافعلرینی هدف آلیش کیچیریلمس دیر.
شونینگدیک، خلق ارا کیچیریم تشکیلاتی، انسان حقوقی ایرکین کمیسیونی نینگ ایشلاوچیلری گه بولگن هجومنی دهشتلی دیب و بو واقعه عامللرینی تانیلیب قولگه آلینیشی اوستیگه تأکیدلگن.