بلخ ولایتی‌نینگ مارمل تومنیده برق ترماغی جمهور رئیس تامانیدن آچیلگنیدن 2 آی اوتماقده؛ بیراق مذکور تومن‌نینگ اهالیسی حاضرگچه برق دن محروم دیر.
مارمل تومنی ولسوالی فضل‌الدین جسورنینگ ایتیشیچه، اوشبو تومنده برق یوقلیگی اهالی‌نی ایسیق موسوم ده کوپینچه قیین‌چیلیک‌که روپه‌ره قیلگن.
جسورنینگ کوپه‌یتیریشیچه، 2 آیدن بویان نیچه مرته شکایت‌لرینی بلخ حاکمی، آلمان‌لیک شرکت مسؤوللری و برشنا شرکتی بیلن شریک قیلگن‌لر؛ بیراق نامعلوم دلیل‌لر باعث، حاضرگچه مارمل تومنی‌نینگ برقی باغلنمه‌گن.
بلخ ولایت مقامی‌نینگ سکتوری خذمت‌لر باشلیغی ذبیح‌الله اختری، مارمل تومنی یشاوچیلری‌نینگ شکایت‌لریگه جواب ایتیشیچه، مذکور تومن‌نینگ برقی شهری ترماق ترقه‌تیلیشی‌ده قیین‌چیلیک بولگنی سبب، باغلنمه‌گن.
بیراق، مارمل تومنی‌نینگ ولسوالی بو بیانات‌لرنی رد قیلیب ایتیشیچه، پروژه‌نی تطبیق قیلگن آلمانی شرکت بیلن صحبت قیلگن و شهری برق ترقه‌تیلیش سیستمی‌ده هیچ قیین‌چیلیک یوق دیر.
لیکن بلخ ولایتی‌نینگ برشنا شرکتی باشلیغی نسیم گنجی‌نینگ ایتیشیچه، کمپیوترده برق میترلر رویخط‌گه آلینیشی و میترلرنی پوللری توللنمه‌گنی باعث، مارمل تومنی‌نینگ برقی باغلنمه‌گن.
گنجی گه کوره، مارمل تومنی‌نینگ اهالیسی‌نی میترلری برشنا ریاستی‌نینگ کمپیوتریده رویخط‌گه آلینگونگه‌قدر، مذکور تومن‌نینگ برقی باغلنمه‌یدی.
مارمل تومنی‌نینگ اهالیسی کوپ ییل‌لردن بویان برق نعمتی‌‌دن محروم دیر و بو تومنده برق ترماغی جمهور رئیس تامانیدن آچیلگنده، تومن اهالیسی بوندن سونگ برق دن فایده‌لنیشی توغریسیده امید قیلگن ایدیلر؛ بیراق بو امید حاضرگچه حقیقت گه اوزگرمه‌گن.
