شماری از باشنده‌گان ولسوالی دشت‌قلعۀ ولایت تخار می‌گویند که جسد یک شهروند کشور در تاجیکستان کالبدشکافی شده است.
به گفته آنان، نیروهای مرزی تاجیکستان صبح امروز (یکشنبه، بیست‌وچهارم حمل) یک جسد کالبدشکافی‌شده را در بندر آی‌خانم تسلیم نیروهای سرحدی کشور کرده‌اند.
صدام‌حسین، باشندۀ ولسوالی دشت‌قلعۀ تخار به نقل از پزشکان شفاخانه سینا در این ولسوالی به سلام‌وطندار می‌گوید که جسد این مرد در آن سوی مرز کالبد شکافی شده است. از شفاخانه سینا کسی حاضر به گفت‌وگو در این باره نشد.
گفته می‌شود مردی که جسدش در آن سوی مرز کالبدشکافی‌شده، باشندۀ اصلی ولسوالی چاه‌آب ولایت تخار است.
شکافتن کالبد جسد شهروندان کشور در تاجیکستان تازه‌گی ندارد و ولایت‌های هم‌مرز با دریای آمو بارها شاهد چنین اتفاقاتی بوده‌اند.
