سلام‌وطندارنینگ بیر آی‌لیک گزارشی‌گه کوره، اوشبو آی‌ده عیاللرگه قرشی زوروانلیک اینقسه عیال‌لرنی طالبان تامانیدن اوققه توتیلیشی کوپه‌یگن. شونینگدیک، عیاللر وزیرلیگی مسووللری، 1399- ییل نینگ بیرینچی 6 آی‌ده عیاللرگه قرشی زوروانلیک کوپه‌یگنینی تصدیق‌لگن.
عیاللر وزیرلیگی تامانیدن بیریلگن رقم‌لرگه کوره، اوتگن 6 آی جریانیده عیاللرگه قرشی 3 مینگ و 871 زوروانلیک واقعه قید ایتیلگن. عیاللر وزیرلیگی سوزلاوچیسی رویا دادرس نینگ ایتیشیچه، جاری قویاش ییل نینگ بیرینچی 6 آی‌ده عیاللرگه قرشی 64 جدی زوروانلیک واقعه قید ایتیلگن و اولردن کمیده 10 ته‌سی طالبان نظارتیده بولگن منطقه‌لرده یوز بیرگن.
اونینگ کوپه‌یتیریشیچه، طالبان نظارتیده بولگن منطقه‌لرده یوز بیرگن واقعه‌لرنی تیکشیره آلمه‌گنلر.
جاری ییل 30 سنبله‌ده طالبان جنگریلری بیر عیالنی سرپل ولایتی نینگ سانچارک تومنیده اوققه توتگن.
سانچارک تومنی ولسوالی نقیب‌الله دقیق نینگ ایتیشیچه، طالبان جنگریلری اوشبو عیالنی سانچارک تومنی نینگ «تخای‌خواجه» منطقه‌سیده نامعلوم دلیللر باعث اوققه توتیب اولدیرگن.
جناب دقیق‌گه کوره، مذکور عایشه ناملی عیال‌دن 3 باله قالگن.
سرپل ولایتی بوییچه عیاللر ریاستی مسووللری نینگ ایتیش‌لریچه، جاری قویاش ییل باشلنگنیدن حاضرگه‌قدر طالبان نظارتیده بولگن منطقه‌لرده عیاللرگه قرشی 15 زوروانلیک واقعه قید ایتیلگن.
شونینگدیک، 29 سنبله‌ده تخار ولایتی نینگ رستاق تومنیده بیر کیشی 17 یاشر تورموش اورتاغی(خاتینی)نی اوققه آرقه‌لی اولدیرگن. اولدیریلگن عیال نینگ سینگیلیسی‌نی سلام‌وطندارگه ایتیشیچه، مقتول فاجعه‌لی شکلده اولدیریلگن.
باشقه بیر خبرگه کوره، 26 سنبله‌ده بیر کیشی نیمروز ولایتیده سابق تورموش اورتاغی (سابق خاتینی)نی پیچاق آرقه‌لی اولدیریب و قیزینی یره‌لنتیرگن.
نیمروز ولایتیدن محلی بیر منبع نینگ ایتیشیچه، مذکور عیال نینگ سابق تورموش اورتاغی(سابق ایری) نیچه ییلدن سونگ، قومی جرگه‌ده قیزینی سرپرست‌لیگی‌نی قولگه آلیش‌نی ایسته‌گن، بیراق سابق تورموش اورتاغی نینگ جدی قرشی‌لیگی بیلن روپه‌ره بولگن.
عین‌حالده، باشقه بیر کیشی اوشبو ولایتده اوز سینگیلی و تورموش اورتاغی(خاتینی) نینگ سینگیلیسی‌نی اوققه توتگن. نیمروز ولایتی نینگ مطبوعاتی مسوولی بهرام حقمل نینگ ایتیشیچه، مذکور کیشی نینگ نامی احسان‌الله دیر. اونینگ کوپه‌یتیریشیچه، احسان‌الله نیمروز ولایتی نینگ چهاربرجک تومنیده اوز سینگیلی و تورموش اورتاغی نینگ سینگیلیسی‌نی اوققه توتگن.
26 سنبله‌ده قندهار پولیس قومندانلیگی بیر عیال نینگ جسدی تاپیلگنیدن خبر بیرگن ایدی. قندهار پولیس قومندانلیگی سوزلاوچیسی جمال‌ناصر بارکزی نینگ سلام‌وطندارگه ایتیشیچه، اهالی اوشبو جسدنی قندهار شهری نینگ عینومینه شهرچه‌سیدن تاپگنیدن سونگ، پولیس‌گه خبر بیرگن.
مذکور عیالنی کیم‌لر تامانیدن و قچان اولدیریلگنی بیللی ایمس.
.jpg)
بادغیس محلی مسووللری نینگ ایتیش‌لریچه، طالبان گروهی بادغیس-هرات قتناو یولیده بیر عیالنی اوققه توتگن. بادغیس پولیس قومندانلیگی سوزلاوچیسی محفوظ ولی‌زاده نینگ سلام‌وطندارگه ایتیشیچه، مذکور عیال 19 سنبله‌ده بادغیس-هرات قتناو یولیده طالبان تامانیدن اوققه توتیلگن.
اونینگ ایتیشیچه، بو واقعه «لامان» منطقه‌سیده یوز بیرگن.
قندوز محلی مسووللری هم پولیس اعضاسی بولگن بیر عیالنی طالبان تامانیدن اوققه توتیلگنیدن خبر بیرگن. قندوز پولیس قومندانلیگی سوزلاوچیسی هجرت‌الله اکبری نینگ ایتیشیچه، طالبان جنگریلری صالحه ناملی پولیس اعضاسی بولگن بیر عیالنی قندوز شهری نینگ «شوره‌خاک» منطقه‌سیده اولدیرگن.
عیاللر وزیرلیگی مسووللری نینگ ایتیش‌لریچه، عیاللرگه قرشی رویخط گه آلینگن 3 مینگ و 871 زوروانلیک واقعه جمله‌سیدن 770 ته‌سی مدنی، 1114 ته‌سی عایله‌وی زوروانلیک و باشقه 206 ته‌سی جرمی دیر.
اوشبو وزارت‌گه کوره، مذکور واقعه‌لردن 396 ته‌سی مصالحه و میانجی‌لیک آرقه‌لی حل قیلینگن و باشقه 366 ته‌سی‌گه رایگان مدافع وکیل آلینگن.
عیاللر وزیرلیگی مسووللریگه کوره، کرونا ویروسی چیقگنی، قرنطین، استرس و درآمدی منبع‌لرنینگ قولدن کیتیشی عیاللرگه قرشی زوروانلیکلرنینگ کوپه‌یشی سبب بولگن.
