بدخشان ولایتی‌نینگ محلی مسووللری و یشاوچی‌لری‌نینگ ایتیشیچه، مذکور ولایت اشکاشم تومنی‌نینگ برقی، قرضی توللنمه‌گنی سبب تاجیکستان تامانیدن کیسیلگن.
سلام‌وطندارگه صحبت بیرگن اشکاشم تومنی‌نینگ یوکسلتیریش کینگشی باشلیغی جوهر بیک‌نینگ ایتیشیچه، چیگره پولیسی و اشکاشم پولیس قوماندانلیگی‌نینگ برق پولی توللنمه‌گنی باعث، تاجیکستان مذکور تومن برقی‌نی کیسگن. جناب بیک‌نینگ ایتیشیچه، اوشبو حربی‌لر حاضرگچه بیرمرته هم برق پولینی توللمه‌گن.
اونینگ ایتیشیچه، اهالی بیر هفته‌دن بویان قرانغو‌ده قالگن و محلی حکومت اوشبو قیین‌چلیک‌نی حل قیلیش خصوصیده تلاش قیلمه‌گن.
بدخشان برشنا شرکتی‌نینگ باشلیغی سلطان‌محمد عطایی‌نینگ ایتیشیچه، چیگره پولیسی تامانیدن برق پولی توللنمه‌گن، اساسی قیین‌چلیک‌لردن دیر. جناب عطایی‌گه کوره، مذکور قیین‌چلیک‌نی حل ایتیش اوچون سعی و حرکت‌لری دوام ایتماقده.
بیراق، مذکور ولایت امنیه قوماندانی عبدالخالق آقسای‌نینگ ایتیشیچه، اولر برق پولینی تول‌له‌گن. شونینگ‌دیک، او ملی مدافعه وزیرلیگی‌گه تیگیشلی چیگره پولیسی‌دن تیزلیک‌ده برق پولینی توللشینی سوره‌یدی.
کمیده تورت ییل‌دن بویان تاجیکستان بیلن چیگره داش تومن‌لرنینگ برقی تاجیکستان تامانیدن تامین ایتیله‌دی. ایلک بار مذکور تومن‌لردن بیری‌نینگ برق پولی توللنمه‌گنی باعث، اوشبو مملکت تامانیدن برقی کیسیله‌دی.
